Вай гьантрай МахIачкъалалив хьунни ДР-лул БакIчиначIасса Граждан обществалул ва инсантурал ихтиярду хьхьичIуннай даврил советрал заседание
[dropcap]З[/dropcap]аседаниялул даврий ларгсса шинал дурсса даврил хIасиллая бувсунни Советрал председатель Зикрулла Илиясовлул. Цала ихтилатраву кIицI лавгунни Дагъусттаннал граждан обществалул институтру хьхьичIунмай баву ва инсантурал ихтиярду дуруччаву мурадрай тамансса давуртту дуршиву, бувсунни Республикалул БакIчинал советрал члентуращалсса хьунабакьавурттай ккавккун бивкIсса маслихIатру ва тIалавшиннардугу дузрайн дуккан дуршиву, бувсунни махъсса шиннардий Аьрасатнал личIи-личIисса шагьрурдайсса дуснакьирттавун ва изолятордавун бавкьусса дагъусттанлувтурал ихтиярду ссуссукьу дуллалисса ишру хIисав хьушиву.
Советрал мукунма къулагъасрайн лавсун бур районнал каялувчитурал чулуха инсантурал ихтиярду ссуссукьу хьун къаритаврил масъалартту. Масала, ларгсса шинал Советрал члентурал кумаграйну ЦIунтIиннал райондалул бакIчинал ва Гутатлиял школалул директорнал дянивсса къалмакъал маслихIатрайн дурцуну дур. Му бакъассагу, бювхъуну бур 1-мур группалул инвалидтуран ва мушакъатсса оьрчIру бусса кулпатирттан хIукуматрал чулухасса кумагру тIалав бан. Советрал члентурал хIарачатрайн бувну укунсса оьрчIру бусса кулпатирттан дуллуну дур къатри машан ласунсса соцвыплатартту.
Граждан обществалул ва инсантурал ихтиярду дуруччаврил хIакъиравусса ихтилатру бунни «Центр исламских исследований Северного Кавказа» тIисса сакиншиндарал директор Руслан Гереевлул, Дагъусттаннал профсоюзирттал организациялул председатель Аьбдуллагь МахIаммадовлул ва мукунма цайминнал.
Дагъусттаннал Граждан обществалул ва инсантурал ихтиярду хьхьичIуннай давриха зузисса совет сакин бувния шийнмай диялсса давуртту дурну дур Дагъусттаннал культуралул зузалтрал профсоюзирттал комитетрал председатель Марзижат Буттаевал. Ванил бувсунни Советрал президиумрал член хIисаврай цуппа гьуртту хьушиву инсантурал ихтиярду дуруччаву, ялун нанисса ник патриот зумуну тарбия даву ва инсантуран цала ихтиярду кIул даву мурадрайсса конференциярттай, ккуркки столлай ва цаймигу мероприятиярттай.
Ахирданий Зикрулла Илиясовлул кIицI ларгунни ДР-лул БакIчиначIасса Граждан обществалул ва инсантурал ихтиярду хьхьичIуннай даврил совет сакин бувну 20 шин шаврин хасну дантIисса мероприятияртту.
