Апрельданул 21-нний хьунни Дагъусттан Республикалул Халкьуннал Мажлисрал 10-мур сессия. Ва бачин бувну ия ДР-лул Халкьуннал Мажлисрал Председатель Заур Аскандаров.
Мунал бувсунни сессиялий ххал дигьин аьркинну душиву «2022-ку шинайнсса ва, ва пландалийн ларсъсса, 2023-ку ва 2024-ку шиннардийнсса ДР-лул бюджетрал ХIакъираву» тIисса ДР-лул Закондалуву дахханашивуртту даврил хIакъиравусса» закондалул проект. Масъала сессиялий ххал бигьин ккаккан бувну бур ДР-лул БакIчи Сергей Меликовлул.
Му масъалалул хIакъираву ихтилат бунни ДР-лул финансирттал министр Юнус Сяъдуевлул. Мунал тIимунийну, 2022-ку шинайнсса республикалул бюджетрал доходрал бутIа тIайла бацIан бувну хъанахъиссар 12 803831, 36 азарда къуруш.
2022-ку шинайнсса республикалул харжлугъралмур бутIа хьуну бур 203 105 495,7 азарда къуруш. Бюджетраву чан хъанай дур (дефицит бюджета) 19 787 147,8 азарда къуруш. Финансирттал министрнал гьартану бувсунни дуркIсса арцу бюджетрал статьярттайх дачIаврия. Бюджетрал харжлугъру гьарза дурну дур «Национальная экономика» тIисса бутIувун, захIматрал рынокраву чIуяву чан давривун ва цаймигу бутIравун.
Ялун ххи дурсса арцу дичинтIий дур мукунна шяраваллил хозяйствалун ва чавахъру бугьаврин кумагран, коммунал техника лизинграй ласун, ххуллурду бакьин буван, къатраву лифтру дакьин дуван ва цаймигу иширттан.
Сессиялий ДР-лул Счетная палаталул бакIчи Билал Жяъпаровлул бувсунни 2021-ку шинал му идаралул бюджетравун зана дурну душиву 103 млн къуруширттал.Мунал тIимунийну, Счетная палаталул дурну дур 142 хъиривлаяву, диялдакъашивуртту хьун дурминнайн чирчуну дур 100 предписание ва бюджетраву личIан дурну дур 43 млн къуруширттал.
Сессиялий ххал бивгьунни цаймигу масъалартту.
