Мусал арс Мусаев Идрис
Вай гьантрай аьпалухьхьун лавгунни ххаллилсса лаккучу, кIулшивуртту дулаврил ххуллий хъунмасса захIмат бивхьусса аьлимчу, тарихрал элмурдал доктор, КIямашрал шяравасса Мусал арс Мусаев Идрис.
Увну ур Идрис 1963-ку шинал апрель зурул 21-нний. 1986-ку шинал ЯтIул дипломрай къуртал бувну бур Дагъусттаннал университетрал тарихрал факультет. 1993-ку шинал лайкьну дурурччуну дур элмурдал кандидат хьунсса диссертация.
1994-ку шинал Дуклаки оьрчIал творчествалул дворецрачIа «Гулливер» тIисса школа тIитIайхту, Идрис Мусаевич ивтун ур Дворецрал генеральный директорнал хъиривчуну. Ва дачин дурну ивкIун ур элмулул ва методикалул даву. 2003-ку шинал, лавайсса даражалул пишакар ва гьунар бусса каялувчи хIисаврай, ивтун ур «Гулливер» школалул директорну.
2006-ку шинал А. И. Герценнул цIанийсса Педагогический университетраву дурурччуну дур элмурдал докторнал диссертация.
2007-ку шинал ивтун ур ДИПКПК-лул (Дагестанский институт повышения квалификации педагогических кадров) ректорну. Шиккугу ванал чIалачIи бувссар цала бюхъу-бажар. 2013-ку шинал февраль зуруй ва увцуссар ДР-лул КIулшивуртту дулаврил ва элмулул министрнал хъиривчуну.
Идрис ия дуккаврил, элмулул ххуллий лайкьшивуртту дурсса аьлимчу, гьунар бусса каялувчи, цила икIайкунсса интеллигент. Ва бусравну икIайва шяраваллил жяматран ва цинявппагу кIулминнан.
Идрис аьпалул шаврил кьурчIишиву кIидачIлай, жижара буллай буру кулпатрахь Бадрижатлухь, арснахь Аьвдурашидлухь, душнихь Сабинахь, уссурссуннахь, цинявппагу гъан-маччаминнахь.
РухI хъинний дишиннав, алжаннул ххари аннав, махънал оьрмурдай барачат бишиннав.
КIямашрал жямат
Бадруттиннул арс МахIаммадов Ясупи
Оьрмулул 88 шинаву аьпалухьхьун лавгунни Инишиял шяраватусса ххаллилсса чув-адамина, итххявхсса специалист, физика-математикалул элмурдал кандидат, Бадруттиннул арс МахIаммадов Ясупи./
Увну ур Ясупи 1934-кусса шинал Инишиял шяраву. Инишав ва Вихьлив школа бувккуну махъ, ванал къуртал бувну бур Дагъусттаннал паччахIлугърал педагогикалул институт.
1962-ку шиная шийнмайсса ванал сайки щалва оьрму бавхIуну бур Дагъусттаннал Элмийсса центрданул Физикалул институтрацIун, укунасса элмийсса зузалал даврияту айивхьуну, физикалул лабораториялул каялувчинайн ияннин. 1966-ку шинал дурурччуну дур кандидатшиврул диссертация.
Ясупи МахIаммадов хIисав хъанахъиссар Дагъусттаннай Физикалул институтрал гьану бивзминнавасса цану. Му институтрал сийгу хьуссар щалагу Ухссавнил Къапкъазрал лагрулийсса.
Ясупил кIунттила дуркссар сайки 200-нния лирчусса элмийсса давуртту, статьяртту.
Цала даврил ххаллилсса пишакар акъассагу, ва ия чIярусса жяматийсса давурттавухгу чялишну гьуртту шайсса инсан, жяматрал ва миллатрал хьхьичIунсса патриот. Ванал, чивчуну, чивун буккан бувссар Инишиял жяматрал тарихрайн багьайсса чIявусса затру, хан- хъус.
Ясупи жуятува личIи шаврил пашманшивугу кIидачIлай, дакIнийхтунусса жижара буллай буру ванал ичIувацириннахь, уссур-ссуннахь, махъсса щалагу агьлу-авладрахь. Цал бунагьирттал аьпа баннав, рухI паракьатний дишиннав.
Инишиял ва Ккуцрал
жяматру
ЗахIматсса цIуцIаврища хассал ан къавхьуну, апрель зурул 14-нний жуятува личIи хьунни ххаллилсса педагог, аьлимчу, каялувчи, Мусал арс Идрис Мусаев.
Идрис ия захIматрал ва элмулул ххуллу лайкьну бивтсса аьлимчу, политикалул элмурдал доктор, Дагъусттаннал университетрал Аьрасатнал тарихрал кафедралул профессор. Ванал лекциярдах гъирарай вичIи дишайва студентътурал. Чув зий ухьурчагу, цува зузисса кIанттурдай сийлий, хIурматрай икIайва.
Идрис ия ххаллилсса ппу, хъинсса дус. Шяраваллил жяматран, дустуран, даврил уртакьтуран ва кIулссия марцIсса, тIайлашиву ххирасса, цала махъ бусса инсан хIисаврай. Инсаннал къуллугърах, даражалух къаурувгун, гьарнащал ца куццуйсса икIайва.
ЛяличIину ххирая ванан дустал. ХIарачат байва мукъуйну, канийну цащава шайсса кумаг бан, захIматсса чIумал чIарав ацIан.
Буттал куннасса аякьа дикIайва дуклаки оьрчIах ва студентътурах. Ва усса кIанттурдай дикIайва рахIатшиву, гъилишиву.
Ванал хъунмасса хIурмат бикIайва цала учительтурал.
Идрис Мусаевичлун ххирая спорт. Ва Аьрасатналгу, дунияллулгу футболданул гужсса болельщик ия.
Идрис Мусаевичлул чаннасса симан абадлий личIантIиссар жул дакIурдиву.
Дустал, даврил уртакьтал
