Вай гьантрай МахIачкъалаллал 42-мур школалий хьунни Украиннавусса спецоперациялуву къучагъшиврий жан дуллусса хIаписар НурмахIаммад ХIажимахIаммадовлун хас дурсса выставка. Экспозиция хIадур дурну дия «Аьрасат – ттул тарихри» паркрал пишакартурал. Ванил сиптачи хьунни кIулшивуртту дулаврил ва элмулул министр ЯхIия Бучаев.
Паркрал каялувчи Тимур Велихановлул бусласимунийн бувну, выставка хIадур дуллалийни хъунмур къулагъас дурну дур виричувнал сипатрах. Ва мурадрай салкьи дурну дур кулпатрал архивравасса материаллу, жагьилсса хIаписарнал грамотартту ва цаймигу наградартту.
Выставкалийн дуккан дурмунил чIалачIи буллай бур НурмахIаммад гьарица чулуха гьунар бусса, итххявхсса жагьил ивкIшиву. Выставка хIадур дурну дур цаймигу школарттай ккаккан дансса шартIру хIисавравун ларсун.
НурмахIаммад ХIажимахIаммадовлул жан дуллуссар Донбасс шагьрулий. Десантниктурал колонналул гуж ххишаласса душманнайн данди бацIан багьссар ХIажимахIаммадовлул машина. Цала машина душманнал пIякь учин байхту, роталул командир, гива увккун, десантниктал цала-цаланий бацIаннин цIу цайнна ларсун, талай ивкIун ур. ЗахIматсса щавурду дирукун, махъра-махъсса граната пIякь учин дурну, лагма рургьусса душманталгу кьатI бувну, цалагу жан дуллуну дур.
