Ларгсса нюжмардий Национал библиотекалуву хьунни журналист ва фотохудожник Инна ХIажиевал рирщусса суратирттал «Лики Лакии» тIисса выставка. Ва дурну дур ДР-лул Культуралул министерствалул ва Национал библиотекалул цачIусса «Дагъусттан хъун бан ччай бур» тIисса проектрал лагрулий.
Фотовыставкалийн бувкIсса тамашачитуравух, лак бакъассагу, чансса бакъая вайми-вайми миллатирттаяссагу. Бия хъамал Лакрал райондалия бувкIссагу.
Иннал мархригу Гъумучиял ва Гъухъаллал шяраватусса бур. Ванил цила бусаврийну, Написат тIисса ниттил ниттил нину бивкIун бур Гъумучатусса, махъ нанисса тухумраясса, ниттил ниттил ппу МахIаммад ХIажиев тIурча, ивкIун ур Гъухъалиятусса.
Хъунмур никирал кьадарданийн Лакку билаятрая архну лявхъусса Иннаву, мукьра шинал хьхьичI Лаккуйн багьсса аьрххи сававну, чантI куну дур лакрал тIабиаьтрахсса ва щархъахсса ччаву.
– Инсаннал оьтту-ттурчIавура дикIайхьунссар буттал буттахъул лявхъу миналухсса зуву. Ваниннин Яруссаннал, СсурхIиял, Кьиблалул Дагъусттаннайсса районнал зунттавун цимилгу аьрххи багьсса ттувурив, Лакрал райондалийн бувкIсса чIумал, дакIнивунгу, чурххал базу-базурдавунгу цирив-ца аьлматсса илгьан багьуна, – тIий, буслай бия Инна, выставкалийн бувкIцириннал хьхьичI махъ лахълай.
Фотовыставкалий дирхьусса суратру дур ванил шанна шинал мутталий рирщуну, салкьи дурсса. Ва хъанай дур Иннал творчествалуву мукьилчинсса выставка. Ванил суратирттай, Лакку билаятрал тIабиаьтрал караматшиву дакъассагу, чIалачIи дурну дур, хIакьинугу кIиккува ялапар хъанахъисса, зунттал агьулданул тIул-тIабиаьт ва яхI-намус.
Инна барча буллалисса ва гихунмайгу ванин тIайлабацIу чIа тIисса махъру лавхъуна ДР-лул Жяматийсса палаталул хъунаманал хъиривчув Ссапарбаг Аьбдуллаевлул, ДР-лул БакIчиначIасса Хъунисриннал советрал хъунаманал хъиривчув Сиражуттин Илиясовлул, ДР-лул Музыкантътурал союзрал хъунама Хан Башировлул, «Дагъусттан» ГТРК-лул директорнал хъиривчув ва ДР-лул Культуралул министерствалул Жяматийсса советрал хъунама Ссалам Хавчаевлул, Лакрал райондалул администрациялул чулуха увкIсса Культуралул, спортрал ва жагьилтурал иширттал отделданул вакил Малик ХIусмановлул ва Иннал гьарцагу аьрххилул сакиншинначи Муса Гъапуровлул. Ихтилатру гихунмай хьуна авторнал Лаккуйнсса гьарцагу аьрххи дакIнийн бутлатисса ва шеърирду ккалаккисса.
Фотовыставкалий салкьи хьуну бия шиккун увкIсса гьарцагу тамашачинал я бацIансса, аьзизсса Лакку билаятрал мурцIурду – мюрщи щархъал къума кIичIиртту, хIурматлувсса бугьараминнал, оьрму ккавксса хъун никирал ва тяхъасса мюрщултрал симанну, ризкьи-кьинилуха зузиминнал къайгъурду.
Национал библиотекалуву выставка дикIантIиссар апрельданул 10-ннийнин.
