[dropcap]О[/dropcap]ьрмулуву хъунмасса тIайлабацIу шайсса бур мюрщултрал хьхьичIа-хьхьичIсса тарбиячи-учитель цува тарбия хьусса, мяърипат дусса, цала пиша ххуйну кIулсса ухьурча.
Дяъвилул шиннардийсса учительтал цивппава чIумул тарбия бувсса бия: захIматрал, кьянатшиврул, ахIвалданул, дакIурдил, кувннал кувннахсса ччаву душиврул. Миннавасса цаннаяссар ттул цIанасса ихтилатгу.
Мяммакьурбаннул арс Мяммакьурбанов Сулайман увссар 1925-ку шинал ЧIяйннал шяраву. Ванал буттал Мяммакьурбаннул ва ниттил Аьйшатлул бивкIссар 3 арс ва 2 душ: Сулайман, ХIусайна, Рамазан, ПатIимат, Ххадижат. Сулайман хъанай ур кулпатраву хъуна-хъунама. ЧIяйннал школалий цалчинмур выпускращал школа къуртал байхту, 1941-ку шинал, 16 шинавусса жагьил, кулпатрал ахIвалгу кIюлану буну, мюрщими классирттал оьрчIахь дарсру дихьлансса муаьллимтал биялну бакъа, оьрмулул хъуними учительтал дяъвилийн бувцуну, райондалул ОНО-рал тIайла увккун ур Сулайман Ккуллал школалийн учительну. Муния махъ дарсру дихьлай ивкIун ур Ваччиял ва ЧIяйннал школарттай.
Сентябрьданул 1-нний 1944-ку шинал нагу, ХIанапиев ХIабибгу (орденоносец, СССР-нул лайкь хьусса строитель, СССР-нул ПаччахIлугърал премиялул лауреат), аццул сумкардугу лавсун, гиву ца-ца тетрадьгу, букварьгу бивхьуну, кIурщуя дурсса щекьирал ккуппигу, ца чулух перо бусса, гамур чулух кьалам бусса ручкагу дирхьуну, лавгру 1-мур классравун.
Сулайманнул жу хьхьичIсса ца парталий щябивтунав, чурххал чансса мюрщисса буну. Школалий дарс дихьлайгу унува, ЧIявсса цIуну тIивтIусса детдомрал тарбиячинугу зий ия Сулайман. Дяъви азгъунну нанисса 1943-ку шинал Дагъусттаннал хъуниминнал тапшур бувну бия Ккуллал райондалул каялувчитурайн, Буттал кIанттул цIанийсса Хъун дяъвилий жанну дуллуминнал ва нину-ппу аьпалувух хьусса ятинсса оьрчIан тIитIин Детдом. Республикалий тIивтIусса Детдомирттаву му бия 14-мур.
Райондалул каялувшиндарал къуллугъирттай та чIумал зий бия: Бакриев НурмахIаммад – райком ВКП(б)-лул секретарь (1-мур ЦIувкIратусса), Ибрагьимов Муслим – райисполкомрал председатель (СунбатIлиясса), Загълиев ХIасан – райОНО-рал каялувчи (Хъусращатусса), АьбдурахIманов Жабраил – ВЛКСМ-рал секретарь (Хъусращатусса). Детдомрал директорну ивтун ия МахIаммадов Захар (ЦIийшатусса). Детдом аьркинмунил щаллу буван бакIрайн лавсун бия ЧIяйннал колхозрал. Детдомрайн кьамул буван ккаккан бувну бия 60 душ-оьрчI. ЧIявсса Детдом Гъумукун бизан буллалисса чIумал (1953 ш.) оьрчIал ккал диркIун дия 250-ннийн дирсса. Вана та чIумалсса детдомрай зий бивкIминнал сияхI:
КьурбанмахIаммадова Аьйшат – директор (ЧIятусса)
МахIаммадов Захар – завуч (ЦIийшатусса)
ХIажиева Жаннат – тарбиячи (ЧIятусса)
Жамалуттинова Асият – тарбиячи (ЧIятусса)
Мяммакьурбанов Сулайман – тарбиячи (ЧIятусса)
МутIаллиев Наби –завхоз (ЧIятусса)
Сулайманова ПатIимат – уборщица (ЧIятусса)
Дагумов Жамалуттин – повар (ЧIятусса)
Мяммаев Лукьман – инструктор (Гъумучатусса)
Мяммаева Шамай – янна дурухху (Вилттащатусса)
МутIаллиев Аслан – пионервожатый (ЧIятусса)
Мяммакьурбанов Сулайман най унува оьрчIан ххира хьусса учительгу, тарбиячигу икIайва. Ккаши-мякьсса, лаххиялул кIюласса оьрчIавун ххуйсса дакIнил гьавас бутайва. ОьрчIан му цала ппу куна чIалан икIайва. ОНО-рал школарттайсса мюрщими классирттаву дарс дишаврил кьяйда дурчIин дувуну – методистнугу ия Сулайман.
Мунал дарс дишаврил методика ххуй дирзун, Республикалул Учительтурал кIулшиву гьаз дайсса институтрал кьюкьлувугу гьурттушинна дувуну ивтун ия. Мунал методикалия чивчуну бивкIссар «Начальная школа» тIисса журналданийгу. Сайки ряхцIалунния тийннайсса шиннардий зий ивкIссар Сулайман школалий, Детдомрай. Мунал захIматран лайкьсса кьиматгу бивщуссар хIукуматрал: «Отличник просвещения РСФСР», «Отличник просвещения СССР», «ЗахIматрал ва дяъвилул ветеран», «За доблестный труд в Великой Отечественной войне» тIисса ва цаймигу медаллу. Буттан лавхьхьуну итххявхссагу, чиву сий дуссагу бур Сулайманнуя бивзсса наслу – 5 арс ва 1 душ.
Апрель зурул 6-нний 2015-ку шинал, оьрмулул 90 шинаву, аьпалул хьунни ттул цалчинсса учитель – Сулайман, ххаллилсса инсан ва пишакар.
Вил бунагьирттал аьпа баннав!
