Аьрасатнал Президент Владимир Путиннул Мюхчаншиврул Советрал члентуращалсса оператив совещаниялий бувсса ихтилатрава.

Февраль зурул 24-нний Украиннаву хасъсса аьра­ли операция байбивхьуссар. Донбассрайсса жулва агьлу буруччаву мурадрай, жулла Ватан дуруччаву мурадрай, Аьрасатнал солдатътал ва хIаписартал чувшиврий биттур буллай бур аьра­ли бигарду, хIакьсса вир­ттал кунма. Жулва аьрал талай бур кьянкьану, цивппа тIайлашиврий дакI дарцIуну. Щавурду дирну, цIунцIияртту хьуну бухьурчагума, солдатътал ва хIаписартал хIура хъанай бакъар ххувшаврил цIаний. Аьрали гьалмахтал ва агьали ххассал буллай, жанну кьурван дуллай бур. Мяйжаннугу, жулва аьралгу, Донбассрал ополченталгу вас-ццах бакъа дяъвилул цIаравун ххяхлай бур, виричувшивуртту дуллай бур…
На хъунама лейтенант, Энгельслул арс НурмахIаммад ХIа­жимахIаммадов Аьрасатнал Виричувнал цIанин ккаккан ув­сса указрай къулбас дував. Цуксса кьурчIинугу, посмертно, дунияллия лавгун махъ. Ва асланну каялувшиву дуллай ия, хIакьсса командир куна, цалва кьюкьлувуми буруччин хIарачатгу буллай. ЗахIматсса щаву дияйхтугу, ва, ивчIаннин кьянкьану авцIуну, талай ия, яла. цува вив ласун найсса бувчIуну, ясирну къаагьаншиврул, граната пIякь учин дурну, цувагу, цува вив ласун къанихсса боевикталгу литIун бунни. Ванан кIулну бивкIссар цува неонацистътурачIан ясирну агьан къабучIишиву, миннал ясирну багьминнай оьккисса зулмурду буллай, къиялий литIайшиву. На оьрус миллатрал инсанна, жул агьулданийгу лагмава Иванхъул ва Марьяхъулли бусса. Амма ттун укунсса чувшиврул ишру ккав­ккукун, эбратрансса вирттал ккав­ккукун, Дагъусттаннаясса жагьилнал, лаккучувнал, НурмахIаммад ХIажимахIаммадовлул, гьунарданул хъирив ччан бивкIунни учин: на лаккучувра, дагъусттанлувра, чачанна, ингушра, оьрусра, татаринна, жугьутIра, мордвинна, аьсатIинна…Шанттуршунниха ливчусса, Аьрасатнавуцири циняв миллатру кIицI лаган къахьун­ссар, зунмагу бувчIлай бухьунссар къахьуншиву, учин ччисса мура, на пахрулий ура нава ва авкьатсса, азгъунсса, кутак дусса, чIяву миллатру бусса Аьрасатнал дунияллул бутIану ушиврия…