Каспийск шагьрулий ковид-госпитальданул «ятIул зоналия» хъин бувну итабавкьунни Буттал кIанттул цIанийсса Хъунмасса дяъвилул ветеран , 99 шинавусса Сахнина Нина Ивановна.

ВетеранначIан бивунни шагьрулул хъунаманал хъиривчув Жанна ТIагьирова. Ванил бувсмунийн бувну, Нина Ивановна, реанимациялий лахъи гьарчагу, лавмартсса вирусраяр ххув хьуну бур, ххуйну бура тIий бур. Дяъвилий Нина Сахнина связисткану зий бивкIун бур. Польшанаву ва цаймигу билаятирттай дяъвилул ххуллурдайх бувккун бур. Берлиннайн бияннин лавгун бур. Каспийскаллал азарханалул хъунама хIакин Расим Рамазановлул бувсмунийн бувну, Нина Ивановна багьну бур азарханалийн гьутрурдал 55 % поражение дуну кIира нюжмардул хьхьичI. ХIакинтуралгу шаймур бувну бур ва вирусрал ххяппурттаща ххассал буван. Амма Нина Ивановнал цилвагу биялсса хIарачат бия мадад къабулун ва, цIуру-кIурулухун къабагьну, хIакьсса талатала кунма, азарданущал ччалли бувккуна, хьхьарашиву къадурна, тIий бур хIакинтал. Расим Рамазановлул бувсунни коронавирусрал азарданул къашай хъанахъиминнал аьдад Каспийскалий чIаланну чан хьушиву, сайки 58 %. Амма уттигу хIура буккансса чIун дучIан дурашиву, Роспотребнадзорданул тIалавшиннарду дуруччин аьркинну бушиву.