КIийла-кIийла ковидрал азар лахъан багьну, инжитну ивкIсса на, участокрал хIакин, лакку душ, Оьмарова ПатIиматлул тIайла увккунав «Республиканская больница восс­тановительного лечения» тIисса кIанттайн.

Нава хъин уллалисса душ ла­кку душ бушиву ттун ванил фамилия баяйхтува бувчIуна. Ванил фамилия Дундарова дия.
Дундарова Зинаидал къашайшалтрал чулийннайсса бур­гаву, занакьулушин ттунна ххуй дизлай духьувкун, на гъан хьуссияв хъунама хIакиннал хъиривчуначIан, Загьидинал арс ХIусайнов ХIа­жиначIан (мугу жула Уручуллал шяраватусса ия), Зинаидая «Илчилий» чичин лайкьссарив куну цIуххин. ХIажинал хъиннува ххуйну бу­чIиссар увкукун, на Зинаида Назимовнащал чIиви-хъунсса ихтилат бувссия.

– Зинаидай, вил агьлу-авладрайгу буссияв хIа­кин­шиврул пишакартал?
–Ттул буттал буттал ппу, Ккулатусса Дундар ивкIссар халкьуннал хIакин. Бу­ттал ппу Дундаров Анварбаг цила чIумал ивкIссар Ккуллал райондалул ЦIуллушиву дуруччаврил управлениялул каялувчину. Муния мукьах Буйнакскаллал поликлиникалий хъунмасса хIаллай хъунама хIакинну зий ивкIссар. Ттул ниттил нину, Дундарова Зинаида, ттун цIа дирзсса оьрус хъамитайпа, бивкIссар медсестра. Буттауссу Дундаров Залимхан, медициналул элмурдал доктор, профессор, хирург, Белоруссиянаву Гомельскаллал мединститутраву кафедралул хъунаману зий уссар цIанакулгу. Миннаяту ххуй бивзхьунссия ттунгу хIакиннал пиша.
– Буси вила оьр­мулиягу, дуккавриягу.

– На бувссара майрал 30-нний 1995-кусса шинал МахIач­къалалив.
Нину, Дундарова Любовь Николаевна, зий бур бухгалтерну паччахIлугърал идаралий. Ппу, Дундаров Назим Анвардул арс, ккуличу, архитектор, инженер-строитель, зий ивкIссар къатри дуллай Новостройрайн бизлази­сса лакрал халкьуннан.

На бувккуссар МахIачкъалал­лал 4-мур школа мусил медальданий, яла къуртал бувссар Да­гъусттаннал паччахIлугърал медакадемия ЯтIул дипломрай. Муния махъ буккав ординатура. Зун байбивхьура шикку 2020-ку шинал..Ттул давугу найдунура тIайла дарцIуна Дагъусттаннай ковид сукку хьусса чIумуйн. Зий, захIмат буллай, хъин буллай бивкIра «ятIул зоналий».
2021-ку шинал ттун дуллунни «Лучший ординатор 2021 года» тIисса цIа. На бура терапевт. ЦIуцIаву лагь хьуну махъ, жул азархана ковидрал ххиличIлурду духлаган давриха зузиссар. Мукунми чIявусса бур. Му бакъа­сса, на цIана дуклай бура аспирантуралувугу. Инша Аллагь, мугу лайкьну къуртал банна.
– Буттал шяраваллищалсса дахIаву, лага-бучIаву цукунсса дур?
– Ккулув жул дуссар хъинну аякьалий ядуллалисса мина – ххуй­сса буттал къатри, бу­ссар чIявусса мачча-гъанми, хIалассару шяраваллил агьулданущал. Гьарца шинал отпуск гьан дайссар буттал шяраву, щала кулпатрал. ЧIарав бацIайссару шяраву дуллалисса давурттал.
Цилва язи бувгьусса пишалул хьхьичI кьюкьлуву бусраврай ва кьадру-кьиматрай зузисса, захIмат буллалисса жагьилсса хIакиннан чIа тIий буру чIярусса хьхьичIуннайшивуртту, тIайлабацIуртту – давривугу, оьр­мулувугу!

ХIусайн Давыдов,
ш. ЧIурттащи