[dropcap]Н[/dropcap]оябрь зуруй Москавлив Чайковскийл цIанийсса паччахI­лугърал консерваториялул Рахманиновский залдануву жула хъунасса композитор Ширвани Чаллаевлул 85 шинал юбилейран хас дурсса концертрай тамашачитурансса тIитIалану хьуна жагьилсса музыкант Гулбарият ХIусайнова сахIналийн буккаву. Ва фортепианолий руцлай бия Ирина Чаллаевал (Нарскаял) тIутIисса Есениннул мукъурттийсса циклданухун.

Гулбарият Ширванинал ссил Гулбариятлул арснал ХIусайннул душри. Ряхра шинаву бувккун бур музыкалул ххуллийн. ЧIивитIу музыкалул школалийн гьан бансса сиптачину хьуну дур ванил нину Анжела. Цувгу чялишну зий бивкIун бур душнил кIулшиву ласаврил ва цалархIал личIи-личIисса гьунарду итххяххан баврил ялув.

ТачIав пикрилий бакъассия тIар Гулбариятлул музыкант хьун. Амма цила захIматрал хIасиллу къаоьккисса душиву хIисав хьувкун, байбивхьуну бур гьуртту хъанай конкурсирттай, концертирттай. МахIачкъалаливгу хьуну диркIун дур ванил концерт.

– Ччай буссия ттула ххуллу медициналуцIун бахIин. Амма, музыкалул учительнал тIимур ххув хьуну, бувхра музыкалул колледжравун. Ца шинава тIурча, бувхра Чайковскийл цIанийсса Москавуллал консерваториялучIасса Централ Музыкалул школалийн.

[dropcap]В[/dropcap]а куццуй, на лавсъссар цалчинсса, амма хъинну бунияласса ша профессионал музыкалул ххуллийнсса, цанчирча на дуклан бувхсса школа ккаллиссар дунияллий ца яла хьхьичIунсса школалун, – тIий бур Гулбарият. – Къабигьану бия, амма ттун асар хъанай бия лагма-ялттунаясса ка-кумаг – буттая, ниттия, буттал ниттиуссу Ширваниная, ванал кулпат, аьпа биву, Ниная, дустурая. Ширвани хIучI тIий икIайва, на тава-тагу пиша кьабитанссар тIий, музыкалул карьера кулпатрахун ва ужагърахун дахчиланссар тIий. Школалий дуклай бунува занай байбивхьура дазул кьатIyв личIи-личIисса фестивальлайн ва мастер-классирттайн.

Ттула цалчинсса фестивальданийн Нью-Йоркрайн на лавгссияв ниттищал. Яла тIурча, Европанавун на лагайссияв ттуйнува нава. Школа къуртал байхту, ттул профессорнал маслихIат бувна цала каялувшиндарай Гнесиннул академиялуву дуклан. Гивун на дуклан бувхра кIийлва: цал бакалавриатрайн, яла магистратуралийн. Гиву дуклай ттул хьуна ряхра шин. ЦIанакул на дарс дихьлай бура Гнесинхъал академиялуву. Руцлай бура РГСАИ-лул опералул студиялий, архIалва дуклай бура Чайковскийл аспирантуралуву профессор Елена Долинскаял классраву.

Гнесинка къуртал байхту, на кьаст лархIуну буссияв дуккаву кьаритан. Амма ттун дакIнийн багьуна ттатта Ширванинал творчествалия ва лакрал фольклордания элмийсса даву чичин. Мунияту на бувхра аспирантуралувун. Вана на цIунилгу студент. Утти на кIюрххил студентра, кьунниялай – педагог.

[dropcap]Н[/dropcap]а ххарину бура нава ттатта ШирваниначIан гъанну яхъа­най бушиврия — Москавливгу, Тучковалийгу (тикку жул дачарду чIаххуврай дуссар). Мунияту на тайннанний ччя-ччянисса хъамаличура, анжагъ чяй хIачIан бакъасса, архиврду ххилтIу буллангу. Умуд бур ттула захIмат ссайн-бунугу буккан­ссар тIисса.

Ширванинал бусравшиврия вин кумаг шайривкьай, юхссагу жаваблувшинна ххи шайрив тIисса суалданухунгу учин бюхъанссар, ттатта Ширвани ттунсса эбратри гьарцагу хасиятирттаву ва тIуллаву. Ссаяргу на хIайран бара мунал кьаст лархIумур чулийн буккан баврил.

Мунал хасият аьч хъанай дур щала творчествалуву, хаин къавхьунни цала халкьуннал фольклорданийн, музыка европа журалийн буцаврийн лажиннугу кIура къаавунни. ДакI тIайлану цала ххуллийх най, щала дунияллухь Лакрал билаятраяту, миллатраяту, лакку балайрдаяту буслай ур бусса оьрмулий.
ЧIа учинну жула жагьилсса ва гьунар бусса музыкант Гулбариятлун тIайлабацIу!