Ххалла
Вай яру вих бакъа къабурувгссия
Авлул хьуну най бур дакIнил хияллу,
Майдансса ардарах гъалбарцIрунияр,
ЛивцIунугу най бур яшмилул яру,
Къумасса ратIавух мугьалттунияр.
Бавссунугу най бур ттул хIавилул чурх,
Ссавний гъили бургъил чял занчрунияр,
Яраппий, къахьуннав ттун кунна эшкьи,
ОьрчIкъакъунттул дикIух къиргъулун дакъа.
Яраппий, къахьуннав ттун кунна ччаву,
НузручIилул дикIух гъалбурцIин дакъа.
Вай яру вих бакъа къабурувгссия,
Вих бурувгун мукьах кIунтIатIи хьунни.
Ва дакI вищал дакъа къадарчIуссия,
Вищал дарчIуну махъ угь тIутIи хьунни.
Вил цIа кIул хьуну махъ, кIура дар мусий,
КIулши дурккун ларгун, авлия хьунна.
Вийн я бивтътари, ттул мусий-ттиркьюкьий,
Зяъпиран гьухъ дичай качар чурххирайх.
Пахай Сурхайханова
Ина ттуй аьй мадара
Ина ттуй аьй мадара,
Ттул Аьшттарханнал туйгъун,
Ялтту ттурлу даркьуну,
Зулмутраву ливчIунна.
Дури ттун хъуннасса нигь,
Нахчуваннал исвагьий,
Вила дакI ххари хьувкун,
На хъамабитанссар тIий.
Ттупанграй жавгьар бища,
Турлий тарих бишин ба,
Жула лавгмур замана
Карталий чичин бува.
Жагьаннама дуниял,
Ччуччивуй ятIул цIарал…
Жан ттулагу дуккийча,
Ниттил къабувсса рашав.
Буслай къуртал къавхьусса
ХъункIултIутIул дакIнийсса,
Мусил гуни дурцIуну,
Аьщущал тIайла букки.
Ялугьлай щакъаливхсса
Ччаврил къабувччу яру,
Щалихханнин бургарча,
На хIалал къаитанна.
Багъраву хIави бури,
Гьавалул хъюлчу буллай,
ХIавилий булбул бури,
ХIасратрай лухIи ларххун.
Зулмуткъушлил кюрттарайн
Шяруллул гьава бувну,
Гьаваллаву дикIул дакI
Дяъвилий дуклай дури.
Инттунин хъяхъа тIисса
ХъункIултIутIул ва ттул дакI,
Къупливу силул хьуну,
Гулан кIунтIа тIий дури.
Шилтагъну къабурувгсса
БакIраву тIутIул яру,
Щаращул хьхьичI бавкьуну,
Щюлли хьхьирийн лавгунни.
Жагьил, ина лавмартра,
Щюлли шайсса, кьакьайсса,
Нарив лухIи чаннанна,
Пурщирай къадарцIайсса.
Ина кунма бакъара,
Чассагуйх тIутIи дирчун,
Гулаватилул дакIнийх
Ттурлу даркьуну бура.
Жагьаннама чивияв
Щакъаливх буттал шагьру,
Жандалущал архIалсса
Ттуккул бакIран цибави?
Гъумучиял ПатIимат
Ххал ба ххуй душнил гьава
АлхIамдулиллагь, Аллагь, ттул циняр цIарду вийнни,
Жул зарра ляхъан баннин, ляхъан бувсса ттул гьава.
Ссалам, ссалам Идавсийн, мухIжизатрал сахIибнайн,
Мунал муъжизатрая ляхъан бувсса ттул гьава.
ВичIи диша, ххира дус, хавардал натижардах,
Авлахърайх жайран кунма, бавчунни чурххал гьава.
Яъжужтурал лагмасса Зулкьарнайл къапу кунма,
Тти ттул лагма бувккунни, ххуй оьрчI, эшкьилул гьава.
КIаланнувун бавкьусса Сулайманнул жин кунма,
МютIи буван къавхьунни ттуща эшкьилул гьава.
Шатран маз лахьхьин байсса дарвиш бабанал кунма,
Махь буван къабювхъунни ххуй оьрчIах ччаврил гьава.
Ал гьава, суммал гьава, вайлун ли агьлил гьава,
Эшкьилул шадирайсса ххал ба ххуй душнил гьава.
Эшкьилул чурх ччувччусса, ччаврил дакI гьалак дурксса,
Пашманшиврул шад хьусса ххал ба ххуй душнил гьава.
Дунияллий, Ссибирлив, оьрмулул дуснакьирай
АьтIий оьрму нанисса ххал ба ххуй душнил гьава.
Буттал давлат кьабивтун, гъанссанная ка ларсун,
Эшкьи-ччаврил шад бувсса ххал ба ххуй душнил гьава.
Тавханттуя гьав дурну, гьаттая кIаланг дурну,
Хъювусулну щябивкIсса ххал ба ххуй душнил гьава.
Ал гьава, суммал гьава, вайлун ли агьлил гьава,
Гьавалул къума бувсса ххал ба ххуй душнил гьава.
Таргъу-Зунттул яхъулу, Азайннал багъираву
Хъювусулну щябивкIсса ххал ба ххуй душнил гьава.
Щамхал-ханнал къапулий пюрун чIюйлул чIялраву
Яру хъювхъутIи бувсса ххал ба ххуй душнил гьава.
ДакIнил кIирисса угьлил зунттурду ччучлачисса,
Зунчалу зунтту кунма, ххал ба ххуй душнил гьава.
Ал гьава, суммал гьава, вайлун ли агьлил гьава,
Эшкьилул шадирайсса ххал ба ххуй душнил гьава.
Мукьал аьтара бутIлай, чIаврду дярххун нанисса,
ЦIан ттуруллул хьхьем кунма, ххал ба ххуй душнил гьава.
Ар-майданну гьартанна, дардирдал къума бувну,
Гьалмагъайл гъариб бувсса ххал ба ххуй душнил гьава.
Ар дурцIусса тIутIаву тIуркIу буван къашайсса,
Ниттил хъювусул бувсса ххал ба ххуй душнил гьава.
Чассагул багъ кьабивтун, тIутIул ар ккуччу дурну,
Оьрму зия нанисса ххал ба ххуй душнил гьава.
Хханххиравусса цIарал гулан кIунтIатIи дурну,
Яру ливцIун нанисса ххал ба ххуй душнил гьава.
Чурх цIуцIаврил бувгьуну, дакI цIаллил гьалак дурну,
Кьинирдая хьхьу дурсса ххал ба ххуй душнил гьава.
Вих эшкьилул буржиран ччаврил залукI дирхьуну,
Бургъи-зурул кьабивтсса ххал ба ххуй душнил гьава.
Буттал кьини пуч дурну, насаб сан дакъа дурну,
Ляхъиндалул кьабивтсса ххал ба ххуй душнил гьава.
Ал гьава, суммал гьава, вайлун ли агьлил гьава,
Гьавалул аски бувсса ххал ба ххуй душнил гьава.
Ккурккуллал Щаза
* * *
Бюхттул барзунттайсса
ЩютI учай ссулий,
Вила ахIмакьшиврул
РатIайн багьунна.
Щюллисса ардарав
ТIуркIутIи къахънуй,
Балайрду сававну
КъатIул бувгьунна.
* * *
ДахIалай бакъарив
Вай хъуни хъами,
Эшкьилул бувччуну,
Цалий бавцIусса.
ХIалдарай бакъарив
Вай мюрщи душру,
Ччаврил хIал къакIулсса,
Мюрщинувасса.
* * *
Ва дунияллул пикри
ДакIнийнвагу къабагьай,
ДакIнин ххирасса ина
ДакIния къауккара.
* * *
Багъдад буттал шярава
Вайлул хьуну лавгукун,
Зунттайцири щаращив
МикIлавчIуну кьавкьуна.
* * *
Мизитраву луттирайн
ГъалатI багьайсса кунма,
Ттул тахсир бакъа чурххан
Шярал махъру ххи хьунни.
* * *
Ил лагай шагьраххуллу
КIяла арцул хьунугу,
Вин эшкьи хьунсса кIулну,
Ххуллийх къагьантIиссияв.
Ххуй оьрчI, вил буттал къатта
Ашрапирттал хьунугу,
Вин ччаву хьунсса кIулну,
КьатIув къабуккавияв.
* * *
ДурцIуну дур ва ттул дакI,
Ккуллардал мажарнияр.
Мажар битай, бачIва шай,
ДакIнин дарман къалякъай.
* * *
Хъамаличув учIайва,
ЧчатI букайва, лагайва,
ДикIуву дакI дукансса
Ина акъа къавхьунна.
* * *
Арих нани оьручуй,
Аьв къюллу мабукара,
Сальян-Зунттуйх нанийни,
Буки кисаран чIапIив.
* * *
Зунтту зунчала буккай,
Ар микIирала дуккай,
Дуккан дуллай, къадуккай
Вил хханххирава ттул дакI.
* * *
Бюхттул зунттай ав хьурдай,
Вил ттупангирал бутан.
Зунчалу тIутIи хьурдай,
Вил оьру чал хъап учин.
* * *
ОьрчI-оьрчIуннал лахъуни
Ланттулуву бишинна,
Вай шярал хъаннил махъру
Балайлущал гьан банна.
Гьухъа лахъисса банна,
Шярал мукъурттил буцIин.
Лачак хъуннасса данна,
Мукъурттил ялун рутан.
* * *
Зун душварал циванну,
Да Ккурккуллал жагьилтал,
Зун душру къагьассияв
Магьилавхъанний Щаза?
Бигьалагира, ккурккул,
Шанул буччи, хъунимий,
Ссибивзманал ссан дизан
Тти Щаза бакъассарча.
* * *
Архнияту ххал хьурча,
Гъанну хьурдай учара.
Гъанну чIарав ккаккарча,
Хьуву хьурдай учара.
Ва оьрмулий ва эшкьи
ЩинчIав нясив къаданнав,
Хьуну мукьах яданна,
Хьхьурттарай айгъур кунна.
Алхъа бури ратIаву
Бурандалул лиявай,
Нания къалияра,
Дуниял лиярчагу.
* * *
Авдал дури ва ттул дакI,
Зума авхънахь хъян дикIай.
Хъярчъчитал бури яру,
Хъян ивкIнал хъирив лагай.
Агь, ттул къатта ччуччивуй,
Вил бакIрах эшкьи дурсса,
ЧIан дакъа буттукьраву
Ххазина бацIайссияв?
Ттул дакI цIарал ччуччивуй,
Мюрш гъарал хъирив ларгсса,
Мюршну лачIайсса гъарал,
Лухччи дуччин дайссияв?
