Вай гьантрай Дагъусттаннал ФСИН-далул управлениялий хьунни ларгсса шинал дурсса давурттал хIасиллу дуллалисса ва гихуннай дуллантIисса давурттая бусласисса коллегиялул заседание. Шикку гьуртту хьунни ДР-лул ХIукуматрал Председательнал хъиривчув Рамазан ЖахIпаров, Дагъусттаннайсса хъунама федерал инспектор Александр Степанов, Дагъусттаннал УФСБ-лул хъунаманал хъиривчув Венир Фахреев, Дагъусттаннал прокурорнал хъиривчу Глеб Михайлов, Дагъусттаннал Минюстрал управлениялул хъунаманан кIанайсса Марат Зайналов, Дагъусттаннал ОНК-лул председатель Оьмар Оьмаров.
Заседаниялий ларгсса шинал дурсса давурттал хIасиллу дуллалисса ихтилат бунни Дагъусттаннал УФСИН-далул хъунама, виваллил къуллугърал полковник Андрей Поляковлул. Ванал кIицI лавгунни ларгсса шинал УИС-рал къуллугърал хьхьичI ххуттайн лавсъсса масъалартту бивкIшиву низам ва законну дуруччаву, дуснакь бувминнан шартIру дузал даву. Вай масъалартту Управлениялул аьркинсса даражалий щаллу бувшиву.
– Шинал лажиндарай зий бивкIру УИС-рал идарарттал давурттал даража гьаз бавриха, вай подразделениярттаву дуснакь бувминнан тIалавшиннардаха лавхьхьусса шартIру дузал давриха, мукунма 2018-2026-ку шиннардий УИС хьхьичIуннай даву мурадрайсса федерал программа щаллу давриха. 2021-ку шинал Дагъусттаннал УФСИН-далул хIарачатрайну республикалий сакин бувссар жавабрайн увцусса 50 инсан зузи ансса Центр. Центр тIивтIуссар тIайла бацIан баврил 8-мур колониялий. Ва чулуха жул даврил ххуйсса ккаккияртту хьунни. 2021-ку шинал 18% ххишала хьуссар дуснакь бувминнал харж, 24% центрданий зузи бувминналсса, – бувсунни Андрей Поляковлул. Цала ихтилатраву Рамазан ЖахIпаровлул кIицI лавгунни Дагъусттаннал ХIукуматрал кабакьу бантIишиву республикалул хъунисса промышленный идарарттал объектирдай танмихIрайн бувцуми зузи бансса центрду тIитIин.
