КIулшивурттал шинал хъиндайдихьулун Аьрасатнал элмулул кьини РАН-далул Дагъусттаннал Хъиривлаявуртту дуллалисса федерал центрданий (ДФИЦ РАН) элмийсса сессия хьунни. Ва «Интеграция науки и образования» тIисса сессия Дагъусттаннал паччахIлугърал университетращал уртакьну дурсса даву дия.
Дагъусттаннал аьлимтал барча буван увкIун ия республикалул вице-премьер Мурад Казиев, Дагъусттаннал кIулшивуртту дулаврил ва элмулул министрнал цалчинма хъиривчув МахIаммад Аьбидов, ДГУ-лул ректор Муртазяли Рабаданов ва цаймигу бусравсса инсантал. Мурад Казиевлул кIицI лавгунни Дагъусттан Аьрасатнаву элмийсса субъект хIисаврай хьхьичIунминнавух бушиву, дагъусттаннал аьлимтурал Аьрасатнал элму ххуйсса даражалийн гьаз дувавриву хъунмасса бутIа бивхьушиву. Бувсунни хIакьину жагьилсса аьлимталгу республикалул цIа гьаз дуллалисса давуртту дуллай бушиву. МахIаммад Аьбидовлул дакIнийн бувтунни Дагъусттаннай КIулшивурттал шин дуваврил сиптачи республикалул БакIчи Сергей Меликов ушиву, кIулшивуртту дулаврил даву лавайсса шачIанттайн гьаз дуваву так Элмулул министерствалул биялалийсса даву дакъашиву, дагъусттаннал вузирдал ресурсгу диялсса душиву ва уртакьну, бавкьуну мюнпатрансса давуртту дуллантIишиву. Муртазяли Рабадановлул бувсуна цува каялувшиву дуллалисса вузрал элмийсса хьхьичIуннайшивурттая. Гихуннай сессиялул даву мяйва секциялийх бавчIуну дурна.