Январьданул 28-нний Дагъусттаннал БакIчи Сергей Меликовлул ва «Газпром» ПАО-лул Правлениялул Председательнал хъиривчув Виталий Маркеловлул каялувшиврий хьунни Газпром компаниярттал группалул ва Дагъусттан Республикалул ХIукуматрал дянив хIала-гьурттушиврул хIакъиравусса батIаву.
БатIаврий гьуртту хьунни «Газпром» ПАО-лул ва «Газпром межрегионгаз» группалул каялувчитал, мукунма республикалул властьрал исполнител органнал вакилтал.
Миннал ххал диргьунни республикалийн газ буцаврил программа бартдигьаврил ва региондалий газрал аралувусса давуртту лавайсса даражалийн диян даврил масъалартту. Махъру лахълахъиминнал бувсунни газрал хозяйствалул объектру цачIун баврил (консолидация) давуртту къуртал дурну дакъашиву, миннул заллухъру аьям бувну бакъашиву, мукунма газрал сетьру дух дурккун душиву.
«Газификациялул цIусса программа бартдигьаврийну бюхъан тIий бур шяраваллавун газ буцаву анавар дуккан дуван, мукунма газ бувцуну бивкIсса шяраваллаву цаппара газ къабувцуну ливчIсса къатравунгу буцин (догазификация). Ми давуртту цIанасса ппурттуву дуллалиссар», – кунни Сергей Меликовлул.
«2020-ку шинал Дагъусттаннал ХIукуматрал ва «Газпром» ПАО-лул къулбасру дурну диркIссар 2021-2025-ку шиннардий ДР-лийн газ буцаврил хIакъиравусса кьутIилий. Мунил ккаккан бувну бивкIссар 193 шяравусса 41 азарунниха ливчусса къатравун газ буцин», – кунни Виталий Маркеловлул.
Пландалий ккаккан дурсса давуртту 2022-ку шинал бартдигьиншиврул аьркинссар абонентътурал ккаккиярттал база аьям буван, инфраструктуралул объектру ххал буван, хъус-хъиншиврул инвентаризация дуван ва газораспределениялул заллухъру бакъасса объектру ашкара буван. Мунияр ххишалагу, батIаврий гьуртту хьуминнал бувсунни аьркинну бушиву ччувччусса газрахсса багьа булаврил низам цIакь дуван ва закондалул ххуллий ишла къабуллалисса газрал хъирив лаян.
«Дагъусттаннайсса Газпром межрегионгаз группалул хъунмур мурад хъанахъиссар республикалул исполнител властьрал органнащалса цачIусса даву ттинияр тихуннайгу дачин даву. Мукунсса давуну хъанахъиссар сетирдал инвентаризация даву, агьалинал багьа булаврил низам цIакь даву ва закондалий бакъа газ ишла буллалаврил хьхьичIалу кьукьаву», – кунни «Газпром межрегионгаз» ООО-лул гендиректор Сергей Густовлул.
