Февраль зурул 21-нний МахIачкъалалив хьунни ДР-лул Халкьуннал Мажлисрал ирглийсса заседание. Заседаниялул даву дачин дурну ия ДР-лул Халкьуннал Мажлисрал председательнал хъиривчув Камил Давдиев. Шикку гьуртту хьунни Республикалул председательнал бигарду биттур буллалисса Аьбдулмуслим Аьбдулмуслимов, «Единая Россия» партиялул фракциялул каялувчи Заур Аскендеров, «КПРФ» партиялул фракциялул каялувчи Самир Аьбдулхаликьов, Дагъусттаннал кIулшивуртту дулаврил министрнал бигарду биттур буллалисса ЯхIия Бучаев, «Единая Ро­ссия», «Справедливая Россия – Патриоты – За Правду», «КПРФ» партиярдал фракциярттал вакилтал.

Заседаниялул даву дайдихь­лай, Камил Давдиевлул був­сунни,ДР-лул БакIчи Сергей Меликовлул Дагъусттаннал ХIукуматрал председательну Аьб­дулмуслим Аьбдулмуслимов итан­сса кандидатура хьхьичIун ларсшиву.
Ва хъуннасса жаваблувшиву дусса къуллугърай каялувшиву дан бакIрайн лавсъсса Аьбдулмуслим Аьбдулмуслимовлул, депутатътурал суалла­хьхьун жавабру дуллай, кIицI лавгунни агьалинал чулухасса вихшала цIакь даву мурадрайсса давурттаха зунтIишиву, социал масъалартту хьхьичI ххуттайн ласунтIишиву.
Республикалул кIулшивур­тту дулаврил аралуву хьунабакьлакьисса масъаларттая ва ми дузрайн буккан баву мурадрайсса ххуллу-чаранну лякъаврия балжину бувсунни ЯхIия Бучаевлул.
Камил Давдиевлул мукунма кIицI лавгунни Халкьуннал Мажлисрал сессиялий гьаз бантIишиву ниттил мазру буруччаврил масъала.
Ва кьинисса батIаврий депутатътурал мукунма ххал бивгьунни мировой судьятал битаврил хIакъиравусса масъалагу.
Хъирив ххал бивгьунни «Справедливая Россия – Патриоты – За Правду» партия­лул гьашину апрель зурул 2-нний хьунтIисса конференциялий кIицI лагантIисса ма­съалартту. Ва конференциялий бувчIинтIиссар апрель зурул 16-нний Москавлив хьунтIисса съездрай гьуртту хьунсса партиялул депутатътал.
Дагъусттаннал Халкьуннал Мажлисрал давуртту чялишну аьч дуллалаврихлу барчаллагьрал чагъарду буллунни «Илчи» кказит­рал зузалтран – Андриана Аьбдуллаеван ва Имара Саидован.