Ванияр 51 шинал хьхьичI, февраль зурул цанний, ххал дигьлагьисса самолет дагьну, оьрмулуцIа хьуссар Совет Союзрал кIийла Виричув АхIмад-Хан Султан.

Ванал гьаттайн Москавлив гьарца шинах батIайссар Да­гъусттаннал ва Къирим-татарнал агьлу ва дунияллия лавгсса кьини, февраль зурул 1-нний. Гьашинугу вара кьини АхIман-Хан Султан увччусса Новодевичье хIатталлив бавтIунни аслийсса патриот Заурбаг Нахаев хIаласса лак ва Къирим-татарнал диаспора.
– Ххувшаврил байрандалул кьинигу, Виричув увсса ва дунияллия лавгсса кьинирдайгу жу гьаттайн бучIаву батIаву – му цIакь хьусса аьдат дур. Чара бакъа Дагъусттаннал Культуралул центрданул вакилталгу бучIайссар. ЦIанакул, карантиндалул чIун дуну, личIину чIявусса агьлу къабавтIунни, жу, тIутIивгу дирхьуну, Виричувнал оьрмулул ххуллиясса, чувшивриятусса ихтилатругу бувну, алхIам буккарду, дуаьрду дуварду, къирим-татарнал вакилтурал бувккунни Виричувнан хас був­сса шеърирду, на жулла аьдатрай кьулгьу-кьуран буккав. АхIмад-Хан Султаннул цIа, циксса шинну гьарчагу, абадлий, ссавнийсса цIуртти кунна чанна лархъна личIантIиссар, – увкунни Заурбаг Нахаевлул.
Шиккува дакIнийн бутанну, АхIмад-Хан Султаннул аьрали гьалмахтурал, Т.Хрюкин, А.Рязанов, П.Шестаков хIаласса цIанихсса генералтурал увкумургу: «АхIмад-Хан кунасса, нигь-ццах дакъасса, цама къа­ккавкссар, лётчик хIисаврай мунащал цучIав къалаяйссар», – тIисса. АхIмад-Хан Султаннул ссукIуврай тIурчарив, Совет Союзрал Виричув Владимир Ильюшиннул: «АхIмад-Хан Султан, кIийла Виричув акъар, мукьийла Виричуври. Лайкь бувнува къабуллуссар мунан кIива Мусил цIуку. Документирттай мукун бунугу, хIакьинурив мукьийла Виричуври», – увкуну бивкIшивугу.