Декабрьданул 7-нний хьунни коронавирусрайн къаршисса Оператив штабрал батIаву. Муний Дагъусттаннал БакIчинал тIимунийну, вакцинарду баврил давриву хьхьичIуннайшивуртту хъанай дунугу, му давриву жува ттигу махънийн багьну буру, цайми регионнах бурувгун.

Декабрьданул 6-ннийнин вакцинарду бувминнал аьдад республикалий хьуну дур 685 азара инсан. Мурадлувсса ккаккияртту хьун дурну дур 3 муниципалитетрал — Хивуллал (88,7%), Докъузпариннал (82,1%) ва Гумбетуллал (81,2%) районнал. Дагъусттаннал БакIчинал кIицI бунни коллективрал иммунитет дузал даврил тагьар захIмат дуван бюхъайшиву ялун нанисса цIусса шинал байраннал. Му чIумал бюхъайссар прививкарду даврил бущи хIурхIа лаган.Му чIумалгу бартдигьлан аьркинссар QR-кодру щурущи даврил давуртту.
Ххал бигьавурттал хIасиллал тасттикь бувну бур 80% ишбажаранчишиврул объектирдал дуручлай бакъашиву ккаккан дурсса тIалавшинну. Меликовлул кIицI бунни пандемиялущалсса талатавриву хъунмур бутIану хъанахъишиву инсантурал аькьлу-кIулши душаву, за бувчIаву.