Декабрьданул 8-нний ДР-лул ХIукуматрал Председатель АбдулпаттахI Амирхановлул каялувшиврий хьунни республикалийн коронавирусрал цIусса штаммру бучIан къабитаврил масъала ххал бигьлагьисса батIаву.
АбдулпаттахI Амирхановлул тIимунийну, цаппара билаятирттай «Омикрон» журалул ц1усса штамм ашкара бувшиву тасттикь шаврицIун бавхIуну, ДР-лул Роспотребнадзорданул баян бувну бур, мукунсса билаятирттая букIлакIисса инсантал батIул буван аьркинну бушиву, ми къашавай бушиврий щак бивхьуну. Роспотребнадзорданул управлениялул каялувчинал буржру бартбигьлагьимур Раисат Аьрбухановал бусаврийну, цIусса штамм инсантурайн ччяни лахъайсса бур ва ччяни ппив шайсса бур. Мунил лишанну тIурча, цайми штаммирттал куннасса дур.
Дагъусттаннал ЦIуллушиву дуруччаврил министерствалул Каспийскаллал шагьрулул азарханалий хIадур бувну бур шанма палата, му журалул азарданущалсса къашайшалт утту бишин буван.
ЦIусса журалул штамм хIасул хьусса билаятирттая бувкIсса инсантал ва миннащал дахIаву диркIми утту бишин бувансса обсерватор хIадур буллай бур.
Масъала ххал бигьаврил хIасиллу дуллай, АьбдулпаттахI Амирхановлул тапшур бунни ччясса мутталий хIадур буван обсервациялий 100 инсан утту ишин увансса идарартту, мукунсса инсантуран карантин лахъи лагантIиссар 14 кьини.
