Дяоьрмулуву оьрмулуцIа хьусса журналистътал

Дяоьрмулуву оьрмулуцIа хьусса журналистътал

Гьарица шинах, декабрь зурул 15-нний, Аьрасатнаву дакIнийн бичайссар къуллугърал буржру биттур буллай жанну дуллусса журналистътал. Ва кьини кIицI дуллансса хIукму хьуссар Аьрасатнал Журналистътурал союзрал сипталий 1991-ку шинал декабрь зурул 11-нний Югославиянал билаятрай Аьрасатнал телевидениялул корреспондент Виктор Нагин ва оператор Геннадий Куренной ливтIусса чIумал. Дагъусттаннай чIявусса журналистътурацIухсса бунни 90-ку шиннардил ахирдания, цIусса ттуршукулул дайдихьулийн дияннинсса чIумуву.

Вай шиннардий Дагъусттаннай чил канища ливтIунни 19 журналист. ЧIявуми иширттал хIакъиравусса делорду ттигу аьч дурну дакъар.
МахIаммад Сулайманов, Валерий Ефимов, МахIаммад-СалихI Гусаев, Загир Арухов, МахIаммад-Загьид Варисов, Ильяс Щурпаев, ХIажи Абашилов, Рашид Гъазилалиев, Тельман (Аьбдулла) Аьлишаев, Аьбдулмалик АхIмадилов, Шамил Аьли­ев, Саид (МахIаммадсаид) Ибрагьимов, МахIаммадвакил СултанмахIаммадов, МахIамма­саид Темеев, ЯхIия МахIаммадов, Гьарун Кьурбанов, ХIажимурад Камалов, Рамазан Наврузаьлиев, АхIмаднаби АхIмаднабиев. Вай Дагъусттаннал журналистътал мудангу дакIний бикIантIиссар дустуран, даврил уртакьтуран, гъан-маччаминнан. Вай бия цала махъ бусса, тIайламунил цIаний гъалгъа тIутIисса журналистътал.
МахIачкъалалив, Дагъусттаннал Журналистътурал союзрал сипталий хьунни чил канища ливтIусса журналистътал дакIнийн бичлачисса батIаву. Шикку гьуртту хьунни ДР-лул информациялул ва печатьрал министр УмархIусман ХIажиев, Дагъусттаннал Журналистътурал союзрал председатель Аьли Камалов, республикалул СМИ-лул каялувчитал ва журналистътал, ливтIуминнал гъан-маччами.
– Цала къуллугърал буржру бартбигьлай жанну дуллуссар вай журналистътурал. Гьарица бивкIу щалагу республикалул жяматрал дакIнийн щунсса иш хьу­ссар. На зий уссияв МахIаммад-СалихI Гусаевлущал, Загир Аруховлущал, Гьарун Кьурбановлущал. Жул дянив дусшивугу дуссия. Вай бия ляличIисса инсантал. Та захIматсса чIумал вайннал граждан позициялийну, кIулшивурттайну ва бюхъу-бажарданийну бювхъуссар жущава республика лиян сукку хьуминнайн данди бацIан, – увкунни ДР-лул информациялул ва печатьрал министр УмархIусман ХIажиевлул.
Цала ихтилатраву Аьли Камаловлул кIицI лавгунни вай цала даврий дакI марцIну зузисса лавайсса даражалул пишакартал бивкIшиву, журналистнал пиша хIакьинусса кьинигу ца яла оьр­мулун нигьачIаву думур бушиву. Стратегиялул сиптардал ва политикалул технологиярттал центрданул директор Ханжан Кьурбановлул кIицI лавгунни вай Дагъусттаннал бучIантIимуний дакI цIуцIисса хIакьсса патриотътал бивкIшиву, вайннал цала цIарду республикалул тарихраву кьариртшиву.
Аьпалул хьусса журналистътал дакIнийн бутлатисса, Да­гъусттаннал журналистикалул цIа гьаз дан вайннал дурсса давурттая бусласисса ихтилатру бунни Хасавюртуллал Информациялул центрданул каялувчи МахIаммад Кьурбановлул, «Народы Дагестана» журналданул хъунмур редактор Шуана МахIаммадовал.
Цинявппагу ихтилатчитурал кIицI лавгунни вай журналистътал мукъуйнугу, иширайнугу Дагъусттаннай дакьаву дуруччаврил цIаний зий бивкIшиву. «Новая газета» кказитрал хъунама редактор Дмитрий Муратовлул увкусса куццуй, «журналистътал оьрмулия щаливххунни дунияллия гьан аьркинсса».

Андриана Абдуллаева

Андриана Абдуллаева

Читайте также: