СоцсетирдайхчIин вай гьантрай Республикалул БакIчи Сергей Меликовлуйн бувккун бия Лаващиял райондалиясса хъамитайпа, яруннал мушакъатшиву дусса цила душнин дарсру лахьлан кумагрансса ноутбук пиш-каш бувара тIисса тавакъюрай. Бувния шийнмай Маликат Айгубовал дур катаракта ва яруннал нервардал атрофия дусса диагноз.

ЧIивисса душнил дарсру куртIну лахьлансса хиялдания цанма кIул шайхту, Сергей Меликов махIаттал хьуну ивкIун ур. Республикалул БакIчинал хIукму бувну, Каспийск шагьрулийсса Яруннал микрохирургиялул центрданий Маликатлун пиш-каш бувну бур яруннал мушакъатшиву думиннан буккан бувсса хасъсса ноутбук.
Вара кьини Микрохирургиялул центрданул хъунама хIакин Аьлиоьмар АхIмадовлул бакIрайн лавсун бур уква Маликатлул яру ххал бигьин. Дирхьуну диагнозгу, чивчунни аьркинсса даруртту. Му бакъассагу, муналва махъ буллунни Маликат Аьрасатнал хьхьичIунсса яруннал клиникарттай ххал буван тIайла буккан.
Шиккува кIицI лаган, Республикалул Микрохирургиялул центрданул хъунама хIакин Аьлиоьмар Камилович ур Чапаевкаллал шяравасса. Дагъусттаннал медакадемиягу къуртал бувну, ххюра шинай зий ивкIун ур С.Н. Федоровлул цIанийсса Яруннал микрохирургиялий. Аспирантурагу къуртал бувну, мукьра шинай зий ивкIун ур ва Центрданий хирургну.
2021-ку шинал, Микрохирургиялул центрданул каялувчи увчIлачIисса конкурсрал хIасиллайн бувну, ва ивтун ур хъунама хIакинну.