МахIачкъалалив, М. Горькийл цIанийсса Оьруснал театрданул Хъунмур залдануву, хьунни Дагъусттан Республикалул ХIукуматрал «Душа Дагестана» Премия дуллалисса шадлугъ. Ванил сакиншинначитал бур ДР-лул Культуралул министерство ва Республикалул Халкьуннал творчествалул къатта.

Шадлугърал дайдихьу дуллай, ДР-лул культуралул министр­нал хъиривчу, Республикалул Халкьуннал творчествалул къатлул директор Марита МухIадовал бавтIми барча бувна культуралул министр Зарема Буттаевал чулуха. Культуралул ирс ябаврил цуксса хъуннасса агьамшиву дуссаривгу кIицI бувну, ванил увкуна:
– Хъунмасса барчаллагь цалва оьрмурду культуралун хас буллалиминнан, ва дуруччин, хьхьичIуннай дуван хIарачат буллалиминнан. ЧIа тIий бура цинявннан цIакьсса цIуллу-сагъшиву, гуж, дуллалимуниву тIайлабацIу, – куну.
Гала-концертрай гьуртту хьуна «Душа Дагестана» Премиялул 8 номинациялул лауреат ва жулла республикалул районнаясса ва шагьрурдаясса творчествалул коллективру ва таксса балайчитал. Гьашинумур Премиялийн дуркIун дур 5 шагьрулиясса ва 28 райондалиясса 48 заявка.
Шадлугъ хьуна Роспотребнадзорданул Дагъусттаннайсса управлениялул тIалавшиннардугу хIисаврайн ларсун.
Ххарину кIицI лаганну Премиялун лайкь хьусса муниципалитетирттал сияхIрай лакрал шаннагу район душивугу.
Халкьуннал творчество, аслийсса культура дуруччавриву, хьхьичIуннай давриву бивхьу­сса хъунмасса бутIухлу «Халкьуннал музыкалул инструмент» номинациялий «Душа Дагестана» Премиялун лайкь хьунни Лакрал райондалул Культуралул, жагьилтурал политикалул, спортрал, туризмалул центрданул халкьуннал инструментирттал ансамбльданул каялувчи Амир Сулайманов. «Халкьуннал аслийсса культура» номинациялий – Ккуллал райондалул культуралул ва бигьалагаврил центрданул «Вихьлидуш» фольклорданул ансамбльданул художествалул каялувчи Камилат Оьмариева. «Халкьуннал театр» номинациялий – ЦIуссалакрал райондалул М. Чариновлул цIанийсса халкьуннал театрданул актриса Аьйша Жабраилова.
Амир Сулайманов Гъумучиял оьрчIал искусствалул школалий (хьхьичIварив – музыкалул школа) зий ур 1988-ку шиная шийнай. Муниннингу райондалул культуралул оьрмулия ва Культуралул къатлул даврия яувцун къаивкIсса Амир 2014-ку шиная шийнай зий ур райондалул Культуралул къатлувугу. Вара шинал сакин дурну дур халкьуннал инструментирттал ансамбльгу. Амирдул каялувшиннаралусса ансамбльдануву ур 8 инсан, вайннал бищай личIи-личIисса инструментру, гьуртту шай личIи-личIисса шадлугъир­ттай. Цалва оьрму музыкалуцIун бавхIусса, мунихсса ччаврил гьану махъа нани­сса никиравугу бизлазисса, райондалул ва республикалул лагрулийсса чIявусса иширттавух гьуртту шайсса Амир Сулайманов къакIулсса райондалий чансса бухьунссар. Цала буттал ххуллийх най, музыкалул личIи-личIисса инструментругу бищун кIулну, цала жагьилшиврух къаурувгун, лакрал, республикалул эстрадалул цIурттаву лайкьсса кIану бугьлай ур Амирдул чIивима арснал, балайчи ХIасан Сулаймановлул.
Камилат Оьмариевал ва даврий зий хъанай дур 35 шин. «Вихьлидуш» ансамбль цурда сакин дурну дур 1957-ку шинал. Муния шийнмай Камилат кунмасса зузалтрал, хьхьичIарасса аьдатру ядуллай, хъирив наниминнайн тапшур дуллай, ва ансамбльданул аьдатру дуруччаврил даража ялавай хьун бивтун бакъар.
– Жул коллективраву бур оьрмулул хъуниссагу, мюрщиссагу. Ттун хъинну ххирар ттулла даву. Гьашину лайкь хьунна ва Премиялунгу, ххарира, тIааьнни, рязийра ттулла даврин кьимат бищаврия. ТтуцIунна щалла Вихьуллал щаргу ххарину, рязийну дур.
«Вихьлидуш» ансамбльдануву бакъасса, на бура «Бартукь» ансамбльданувугу, гьуртту шара райондалий ва ванил кьатIув хъанахъисса личIи-личIисса шадлугъирттай. «Вихьлидуш» ансамбльданущал лавгссару Санкт-Петербурграйн, Москавлив, Франциянавун бияннин, личIи-личIисса кIанттурдай хьусса Дагъусттаннал культуралул кьинирдай ккаккан дурссар жалин щинав дурцуну лагайсса аьдат. Мукунма гьур­тту шару лакрал хъатIай, цайми-цаймигу тIааьнсса шадлугъир­ттай, республикалул хъун шагьрулий хъанахъисса шадлугъирттай. Жул коллективраву ур 8 инсан. Жул дур жулла бавахъая шихуннай, никирая никирайн нани­сса янна (костюмру), так вай дур жура-журасса. Вай диял къахъанахъийни, шяраваллил инсантуралгу дулай жун цачIара думи, цайминнан аьркин хьуний, мукунна жугу дулару. Хъинну хьунссия цара-цасса янна дуруххансса арцуйнусса каши хьурча.
Аьйша Жабраилова бувну ва хъунма хьуну бур Вихьуллал шяраву. Школалийва хьхьичIунну гьуртту шайсса бивкIун бур балай учин, къавтIун бизан, сценкарттаву роллу дугьан багьлагьисса иширттавух. Школалия махъ Культуралул ва искусствалул училищалул театрданул отделениялийн бувххун махърив театрданухсса ччаву, гъира хъиннува ххи хьуну бур. Шиву дуклай бунува, 2-мур курсирая махъ, аьпа биву, Валерий Эфендиевлул оьвкуну, Лакрал театрданул дуллалисса шадлугъирттай гьуртту хъанан бивкIун бур. Училище къуртал бувну махъ ва зун тIайла бувккунгу бур Лакрал театрданувун. Шиву зий ванил 10 шин хьуну дур. Муния махъ, кулпатрал хьуну, ва ялапар хъанан бивкIун бур ЦIуссалакрал райондалийсса ЦIуссаккуллал шяраву. Лакрал театрдануву салкьи хьусса хъунмасса опыт, театрданувусса хъин-хъинсса артистътурая лавхьхьусса мюнпатсса затру ванин бучIину ляхълай бур цилла давриву.
Амир Сулайманов, Камилат Оьмариева ва Аьйша Жабраилова хъунмасса барчаллагь тIий бур Культуралул министерст­валухьгу, Халкьуннал творчествалул къатлухьгу, цалла-цалла районнал администрациярттахь ва Культуралул управлениярттахь, гьарца цалла дуллалимуниву буллалисса ка-кумаграхлу, кабакьаврихлу, цалла дуллалимур итталун дагьну, кьимат бищаврихлу.