Ниттил кьини Ккуллал райондалул администрациялий

Ниттил кьинилун хасну администрациялул залданувун чяйлухун оьвкуну бия шяраваллаву яхъанахъисса мукьва ва ххи­сса оьрчIру тарбия буллалисса ниттихъайн. Райондалий 25 кулпат бур укунсса. ТIайлар, вайннава цинявннаща тяхъашиврул мажлисрайн бучIан бювхъуну бакъая.

Мажлис тIивтIуна райондалул бак1чи Шамил Рамазановлул.
– Жу, арамтал, муданмагу барчаллагьрай буссару ниттихъайн, зул хъиншиврухлу, ссавурданухлу, кулпатравусса цIу тачIав лещан къаритаврихлу. Ниттияр хьхьичIунсса цичIар дакъассар, дакIнил кIукIлушиврул ахир-зума дакъассар. Зухьхьун цIуллушиву дулуннав, тарбия буллалисса оьрчIал муданмагу ххари буллайнма личIаннав, – куна ванал.
Ниттихъул мукунма барча бувуна райондалул Хъаннил советрал председатель Загьидат ХIамзаевал. Бувккуна цила ляхъан бувсса, ниттихъан хас бувсса шаммардугу. Ниттихъан дуллуна тIутIив ва бахшишру. Райондалул культуралул зузалтрал ккаккан дурна концерт. Миннавух бия РайхIанат ХIа­жиева, Шавлухъ СалихIова, Асият МахIаммадова.
Райондалул бакIчинал хъиривчу Анатолий Давдиев, Ваччиял кIичIирттавух занай, хьунабавкьусса ниттихъан тIутIив дуллай ия. ЧIяруми тIутIиврив дуллуна азарханалул хIаятраву инсантурал цIуллушиврул ялув бавцIусса хIакинтуран.
ЦIуллуну битаннав зу, цинявппагу ниттихъул.