Декабрь зурул шамунний Аьрасатнаву кIицI лагай юристътурал кьини. Ва пишалул байран барча дуван кунма, бусанна вай гьантрай Дагъусттаннал паччахIлугърал университетрал юридический факультетрай студентътал хьунабавкьушиву Дагъусттаннал Адвокатътурал палаталул президентнал хъиривчу, «Бакриев и компаньоны» тIисса адвокатътурал коллегиялул председатель, Дагъусттаннал лайкь хьусса юрист, Къяннал шяраватусса Аьбдурашидлул арс Бакриев Бакрищал. Ва хьунабакьавугу хас дурну дия щаллагу дунияллий кIицI лагайсса байрандалун – Инсаннал ихтиярду дуруччаврил кьинилун.
Бакрил бувсунни студентътурахь агьалинал ихтиярду дуручлачисса даврил агьамшиврия, инсаннал ихтиярду дуруччай Уполномоченныйнал ва адвокатътурал даврил тапаватшиврия ва ми мудангу бавкьуну, уртакьну зун аьркиншиврия. Студентътурал хъамаличувнахьхьун буллунни чIявусса суаллу. Факультетрал декан Шихтимер МахIаммадовлул кIицI лавгунни Бакри Аьбдурашидовичлул дарс студентътурал инсаннал ихтиярду дуруччаврил хIакъираву кIулшивуртту куртIгу, цIакьгу дуваву мурадрайсса мюнпатсса дарс хьушиву ва укунсса хьунабакьавуртту ччя-ччяни дуллан аьркиншиву. Шиккува кIицI лагланна вайва гьантрай Бакри Бакриевлун дуллушиву «Ветеран адвокатуры» тIисса цIагу. Уттинингу Бакри лайкь хьуну ур «За верность адвокатскому долгу» тIисса ордендалун. 1989-ку шиная шийнай адвокатну зузисса, биялсса опытгу, бюхъу-бажаргу бусса, куртIсса ва цIакьсса кIулшивурттугу дусса лавайсса даражалул юрист Бакри Бакриевлущал архIал дакIнийхтуну барча буллай буру цинявгу юристътал, закондалул ххуллу-ххуттай цIакьну бавцIуми ва инсантурал ихтиярду дуруччин хIарачат буллалими.
