Декабрь зурул 8-нний ДР-лул Халкьуннал Мажлисрал депутат Артур Исрапилов, ванал кумагчи Зайнуллагь Мирзоев, ЦIуссалакрал райондалул администрациялул бакIчи МахIаммад-ХIажи Айдиев, КIулшивуртту дулаврил управлениялул хъунмур Светлана Къудаева бивунни райондалул цаппара школарттайн.
Цалчин вай бувкIунни Барчхойтарский СОШ-райн. Шикку ххал бивгьунни пищеблок, столовый ва ххал дунни оьрчIансса дукралул меню.
ЦIухху-бусу бунни байбихьулул классирттал оьрчIан дукрарду дуллалисса ц1игьуртурал давриву цукунсса, ци захIматшивуртту хьунадакьлай дуссарив. Шикку кIицI лавгунни, ххишаласса плита ва морозильник аьркин багьлай бушиву. Райондалул бакIчинал аьркинсса оборудование машан ласунсса арцу итадакьин тапшур бунни райондалул финансирттал управлениялул зузалтрайн.
Депутатнал мукунна къулагъас дунни школалучIансса ххуллийх асфальт щаллуну бувтIун бакъашиврух. Ва ххуллийх асфальт бутIаврил масъала тапшур бунни УМД-лул хъунама ХIамзат Хажематовлуйн. ХIаятравух буклакийни итталун багьлай бия лагма-ялттусса чапар дан аьркиншиву. Ва масъалалул хIакъиравугу райондалул администрациялул бакIчинал архитекторнащал цачIуну кьамул бувну бур кIулшивуртту дулаврил идарарттай ккаккан бувсса кьануннайсса чапар дишинсса хIукму.
Хъирив делегация бивунни ТIюхчардал шяравусса школалийн. ХIакьинусса кьини шикку 100 оьрчIансса школалий дуклай ур 296 оьрчI. Светлана Къудаевал кIицI лавгунни ва школалий 240 оьрчIансса корпус бувансса мюхтажшиву душиву. Депутатнал ва масъалалул хIакъираву маслихIат ккавккунни аьркинсса документру дузал бансса ва муния махъ республикалул даражалий ва масъала щаллу баву цала аякьалийн ласунтIишиву.
Хъамаллурал мукунма ххал бивгьунни «Точка роста» центр бусса кабинет. Ихтилатру бунни дуклаки оьрчIащал, педагогтуращал ва столовыйлул зузалтращал. Шикку хIукму бунни цIусса оборудованияртту машан ласунсса арцу итадакьин.
Депутат вания тихунайгу ччя-ччяни хьунаакьлантIиссар ЦIуссалакрал райондалул агьалинащал, электроэнергиялулсса, щиналсса баврил, ххуллурду, детсадру баврил ва мукунма ЦIуминалийсса агьалинал оьрмулул шартIру къулай даву мурадрайсса цаймигу масъалартту чулийн буккан баврил цIаний.
