Ноябрьданул 10-нний Дагъусттаннал БакIчи Сергей Меликовлул каялувшиврий хьунни республикалий КОВИД-19 азарданийн къаршисса Оператив штабрал батIаву.
Дагъусттаннал БакIчинал тIимунийну, Дагъусттан бухлай бур махъсса 7 гьантлий яла чансса къашавай хьуми бусса регионнавун. Амма мунийну паракьат хьун къабучIину бур, цанчирча къашайшалт ялунгу гьарза хъанай бур, цIуну къашавай хьуминнал аьдад хъин хьуминналнияр хъуннасса дур.
Сергей Меликовлул бувсунни азарданул хьхьичIалу кьукьаву мурадрай ттинин кьамул бувсса чаранну ттинияр тихунмайгу лахъи лаган бантIишиву, миннувух ссуссукьушивуртталссагу.
Республикалул каялувчинал бусаврийну, ми чаранну кьамул бувну махъ, миннувух QR кодиртталссагу, октябрьданул 30-нния ноябрьданул 7-ннийнин вакцинарду бувну бур 63 азара инсаннал – ми хъанахъиссар щалва сентябрьданий бувссаксса инсантал.
Республикалий ноябрьданул 9-ннийнин тестру баврил ккаккия хьуну дур 211,6 -100 азара инсаннан хIисавну, билаятрай норматив дур 200 -100 азара инсаннан. Сергей Меликовлул тIалав бунни тестру баврил бущи лябуккан буван – 300 тестрайн бияннин. Мунийну цIуцIаврил бувгьуми цила чIумал ашкара буллалиссар. Республикалул каялувчинал бувсунни бюджетравату итадаркьуну душиву 100 азарва экспресс-тест ласунсса арцу, миннул цалчинмур бутIа бувкIун бур ва ми бавчIуну бур медициналул идарарттайх.
Региондалул хъунаманал бувсунни мукунма ялун нанисса шиналгу чIиримур ва дянивмур ишбажаранчишиврун кумаг баврил хIакъиравусса документрай къулбас дурну душиву.
Оперштабрал батIаврий ДР-лул Роспотребнадзорданул управлениялул каялувчи Николай Павловлул бувсунни КОВИД-19 азар ппив шаврил тагьардания. Мунал тIимунийну, хIакьинусса кьини республикалий къашавай ур 57 азара инсан, миннавату 45% зукъазисса инсантал. GR-кодру аьркинсса куццуй зий бур анжагъ МахIачкъалалив ва Каспийскалий.
Азарлув хьуми азарханардай хъин баврил тагьардания ихтилат бунни цIуллушиву дуруччаврил министрнал кIанаймур Татьяна Беляевал. Мунил тIимунийну, ларгсса нюжмардий ливтIуми гьарза хьуну бур билаятрай 4,1%, республикалий 0,4 %. Гьарца нюжмардий азарханардай уттубишин буллалими гьарза хъанай бур. ЦIанасса ппурттуву республикалий дузал бувну бур 3100 койка, хъин буллай бур 2400 инсаннаяр ххишаласса. Региондалий дур 20% койкардал луртан.
ХIакьинусса кьини республикалий вакцинарду бувну бур 38 % инсантурал.
