Вай гьантрай Дагъусттаннал БакIчи Сергей Меликов увкIунни Дарбантлив, тикку ххал бивгьунни цаппара инфраструктурардал ва социал объектру. БакIрай республикалул каялувчинал ххал бивгьунни «Жилье и городская среда» тIисса нацпроектрал лагрулий дузал бувсса къатрал чIарахсса кIанттурду. Микку тамансса давуртту дурну дур. Дузал дурну дур 134 квадрат метралул лагрулийсса оьрчIал площадка, футболданул майдан.
2023-ку шинал Дарбантлив бакIуйн буккан бан аьркинссар Спортрал къатта. Проектрал багьа бур сайки 1,5 млрд къуруш. Шанна зивулийсса Спортрал къатта буллай бур кIанттул бюджетрал арцух.
Сергей Меликов ивунни Дарбантлив «Звездочка» тIисса оьрчIал багъ буллалисса кIанайн. Му буллай бур 4-мур Аьралуннал строительствалул управлениялул «Демография» тIисса нацпроектрал лагрулий. ОьрчIал багъ хIисав бувну бур 60 оьрчIан.
Республикалул каялувчи кIул хьунни «Северные» тIисса щин марцI дуккан дайсса канализациялул сооруженияртту дуллалисса давурттащалгу. Ми сооруженияртту дурну дур 80-ку шиннардийра. 2008-ку шинал байбивхьуну бур ми цIу дуккан дуллай. ХIакьину сооруженияртту дакьин дуллай бур ттизаманнул тIалавшиннардацIун бавкьуну.
Мукунма хIукму хьуну бур буван цIусса канализациялул насосрал станция. ХьхьичIмур зия бувну бур Каспий хьхьирил щатIал.Яла региондалул каялувчи кIул хьунни Дарбантлив цIусса микрорайон даврил проектращал. Проект хIадур дурну дур «ОСА» тIисса архитектуралул бюрорал. Микку бикIан тIий бур РувхIанийшиврул центр. Мунил лагма инсантал ялапар хъанансса къатри, университет, школа, кIива оьрчIал багъ, поликлиника, гостиница, идарартту бан тIий бур.
Муния махъ Сергей Меликов кIул хьунни цIуну буллалисса «Патриот» тIисса паркращал.
Дагъусттаннал БакIчинал хъинчулийсса кьимат бивщунни Дарбантлив дуллалисса давурттан.
