Ноябрь зурул 2-нний, хьхьуниву, МахIачкъалалив, Петр 1-лул цIанийсса кучалий, оьккисса авария хьунни. Анаварну нанисса куклу машина Toyota Camry ттурцIайн щуну, шама инсан оьрмулуцIа хьунни. Шупир ва ца пассажир бусса кIанай къуртал хьунни, ца пассажир азарханалий ивкIунни. КIия адамина Республикалул Травматологиялул ва ортопедиялул центрданийн иян унни. Вайннан аьркинсса кумаг буллай бур. ЦIанасса чIумал ва иширал багьана-савав кIул дан хъиривлаявуртту дуллай бур.
Жула ххуллурдай, гьарица кьини тIиссакссагу, литIлай бур инсантал. ЧIяруми ДТП хъанай дур шупIиртал анаварну ягу хьунив ххуллийн бувккун най.
Январь зуруя байбивхьуну, октябрьданийн бияннин республикалий 1,1 азарда ДТП хьуну дур. Миннуву 240- нния ливчусса инсантал оьрмурдацIа хьуну бур, 1,6 азаруннийн бивсса инсантурайн щавурду дирну дур.
Оьвчаву дуллай буру шупиртурайн, рульданух личIлулну бикIияра, ххуллул низам дуруччияра тIий!
Амина Юсупова, ДГУ-лул журналистикалул отделениялул 4-мур курсрал студентка
