Хъунмасса бала хьунни вай гьантрай Къалмукьнаву. Астрахань — Элиста – Ставрополь федерал ххуллий авария хьуну, чIявусса ливтIусса ва бивщусса хьунни. МахIачкъалалия Санкт- Петербурглив нанисса пассажиртуращалсса автобус щунни КАМазрайн. Ва ишираву ряха инсан, миннавух ца чIивисса оьрчIгу, оьрмулуцIа хьунни. Мяйя инсаннан аьркин багьунни медициналул кумаг. Вай биян бунни Элисталул азарханалийн ва Яшкульский ЦРБ-лийн. ЦIанасса чIумал Элисталул азарханалий ур зарал хьусса ца инсан. Ванал цIуллу- сагъшиврул тагьар оьрмулун нигьачIаву дусса дакъар.
Дагъусттаннал ЦIуллу-сагъшиву дуруччаврил министерствалул тIайла бувккунни Элисталийн Дагъусттаннал катастрофардал медициналул центрданул пишакартал ва МахIачкъалалив уцин. Авариялуву хъуннасса цIунцIия хьусса хъамитайпа захIматсса тагьарданий Яшкуллал ЦРБ-лий бур. Ца кIаная цамур кIанайн буцин бучIину бакъар. Медициналул зузалт шаймур буллай бур ва ххассал бан. ЗахIматсса тагьарданува буккайхту, ххал дигьинтIий бур ва санитар авиациялул самолетрай МахIачкъалалив буцинсса сант.
Дагъусттаннал ЦIуллу-сагъшиву дуруччаврил министерство, министр Татьяна Беляева, хъуннасса кьурчIишиву кIидачIлай, жижара буллай бур ДТП- лий оьрмулуцIа хьуминнал гъан-маччанахь. Министерствалул кумаг бантIиссар апатI хьуми ччяни хъин бан.