Дагъусттаннал культуралул ва мазурдил кьинилун хасну дурсса давурттал лагрулий республикалул миллатирттал мазурдийсса диктант чирчунни 60 азарунния ливчусса инсантурал. Вайннава 400 инсаннал чирчунни ДГУ-луву ва ДГПУ-луву.

Ниттил мазурдийсса диктант даврил сиптачину бия ДР-лул Миллатрал политикалул ва диннал иширттал министерство, вайннал сипталуцIун бавкьунни Дагъусттаннал паччахIлугърал университетрал, Дагъусттаннал паччахIлугърал педагогический университетрал филологиялул факультетру ва миллатирттал мазурдийсса кказитирттал редакцияртту.
Диктант чичин бувкIминнал хьхьичI ДГПУ-раву махъ лавхъуна ДР-лул миллатрал политикалул ва диннал иширттал министр Энрик Муслимовлул, ДГУ-раву – мунал хъиривчу Гьарун Давидовлул, кIивагу вузрал филологиялул факультетирттал декантурал.
Диктантрай буккинсса текстру хIадур бувну бия кIивагу вузрал дагъусттаннал мазурдил кафедрардал пишакартурал ва миллатирттал кказитирттал редакциярттал.
ДГПУ-рал дагъусттаннал филологиялул факультетрал дагъусттаннал мазурдил кафедралул хъунмур преподаватель, филологиялул элмурдал кандидат Саадуллаева Римляна Щамхаловнал бусаврийну, лакрал ва кьини диктант чирчуну дур Халил Халиловлул «Зунттуйн лахъаву» тIисса текстрайн бувну. Студентътал ва вузрал преподавательтал бакъасса, диктант чичин бувкIун бур МахIачкъала шагьрулул школарттал учительталгу, аудитория бувцIуну бивкIун бур диктант чичин бувкIсса инсантурал.
– ДакI ххари хъанай дия вайннах бурувгукун. Диктант цурдагу ххуйну чирчуну дия, – буслай бур ва.