![](https://ilchi.info/wp-content/uploads/2021/10/Ziyabutin_Gadzhimirzaev.jpg)
Ххуллурдал аралуву кьунияхъайсса шиннардий зий ур цала даврилгу хIакьсса пишакар, лакрал миллатралгу патриот, жяматийсса ишккакку, цIа дурксса альпинист, «Илчилулгу» хьхьичIунсса дус, ГьунчIукьатIрал жяматрал вакил ХIажимирзаев Зиябуттин Абуссупияннул арс. ХьхьичIунну Москавуллал автоххуллурдал институтгу къуртал бувну, 1998 шиная шихунай зий ур Дагъусттаннал ххуллурдал идаралий: цал — хъунама инженерну, 2003 шиная хIакьинусса кьининийн — машлул ва контрактирдал отделданул каялувчину.
Лакку билаятрайн ччя-ччяни лага-бучIайминнан хIисав къавхьуну къаличIай кIий нигьачIаву ва кьянатшиву хъуннасса ххуллурдал тагьар махъсса шиннардий чIаланну ххуй хьушиву, архсса шяраваллавун гьан-бучIан бигьа хьушиву. Ххуллурдал тагьар ххуй шаврищал цIу бувккунни Лакрал шяраваллал оьрмулул тарг, хьхьичIва буттал шяравун нажагьссавагу къалаглай бивкIсса инсантал сайки гьарца нюжмардийгума лагару тIий бур утти, ххуллурду бигьа хьушивугу кIицI лаглай. НахIакь къаучайхьунссар «Ххуллурду оьрмулул туннурдур» куну.
Гьай-гьай, Лаккуйссагу ххуллурдал тагьар ххуй шавриву хъунмасса бияла ва хIарачат Зиябуттин ХIажимирзаевлулгу буссар.
БайрандалуцIун бавхIуну, жул дянив хьунни чIиви-хъунсса ихтилат.
- – Зиябуттин, махъсса шиннардий хьхьичIуннай хьунни Дагъусттаннай ххуллурду бакьин баврил, цIусса ххуллурду баврил даву. Хаснура ххари хьунсса дахханашиннарду жула лакрал районнайгу хьунни. Буси махъсса ппурттуву дурсса ва дан дакIнийсса давурттая.
– 2015 шиная шихуннай щала Аьрасатнаву чялишну щуруй дуссар программа «БКАД» – Безопасные качественные автомобильные дороги. Ва программа лябукку буну зий дуссар жула республикалийгу. Дагъусттан Республикалул Транспортрал ва ххуллул хозяйствалул министерствалулгу зузи дурунни программа «Мой Дагестан – мои дороги». Вай программарттал лагрулий чIявусса ххуллурду бакьин бувссар ва цIусса бувссар шагьрурдай ва районнай.
Хасну лакрал районная гъалгъа тIурчарив, дурссар ккалли дансса давуртту. Щарату Ккуллал райондалийн бияннинсса ххуллу биялну гьарза-гьартагу бувну, асфальт бавкьуссар. Ххюра шинал хьхьичI ШавкIрату Оьллаарив бияннинсса ххуллул ххюра километралийхсса бутIа, биялну уттагу бувну, бакьин бувссия, шанна шинал хьхьичI Оьллаарияту Ххюлусмав бияннинсса ряхра километралийхсса ххуллугу бакьин бувссар. Бакьин бувссар Ххюлусмав нанисса ххуллияту Читтурав бияннинсса ххуллугу. Гьашину зий буссару Ххюлусмату Буршайн бияннин ацIра километралийхсса ххуллу бакьин бансса проектраха. Хъинну нигьачIисса, сант дакъасса ххуллу бур, навагу кIа ххуллийх ччя-ччяни лагара ПпабакIуйн. ЯлунчIил байбишинтIиссар кIа ххуллу бакьин буллай. Сайки шанттуршва миллион къуруширттал харж бан багьлай бур кIа ххуллу, гьартагу бувну, ххюлгу бивчуну, бакьин бан. Гъинттул багьайкун бакьингу бувну, ххуллуцIухсса чIирттугу лахъ-лахъну бувну, асфальт бувтIуссар ГьунчIукьатIрал шяравунсса километра ва кIиттуршра метралийхсса ххуллийх.
ДукIу ОьхIлилату Кьукнив бияннинсса мяйра километралийхсса ххуллийх, гьарта-гьарзагу бувну, асфальт бавкьуссар, цIанакул бакьин буллай буссар трассалия Кьукуннал шяравун бияннинсса ххуллугу. ЯлунчIил бакьин бан ккаккан бувну буссар Кьукнияту ЦIийшав бияннинсса ххуллугу.
Ларгсса шинал Гъумук кIира ва дачIи километралул ххуллийх асфальт бавкьуссия. ЯлунчIил бакьинтIиссар Мазукъурату ОьхIлилун бияннинсса ххюра километралийхгу. Бакьин бувссар КIубравсса ххюра километралийхсса ва Инишавсса ххуллурду.
Асфальт бавкьуссар Ккулату Хъусрахьхьун бияннинсса ва шяравухсса ххуллийх, ялунчIил шярава кIихунмайсса ххуллийхгу бакьинтIиссар. Бакьин бувссар Ссухърал шяравунсса ххуллу.
ЯлунчIил бакьин бансса ххуллурдал программалуву буссар Шахьуйннал, БахIикIуллал, ЧукIуннал шяраваллавунсса ххуллурду. Вай цинявппагу ххуллурду ххуй бакъасса тагьарданий бия.
Бакьин бувссар цаппарасса ламурдугу. КIира шинал хьхьичI бувну къуртал бувссар СумбатIлия Ккулувсса ламу, Хъюйннал ламу. Къуртал бавай буссар Хъурхъияту ЦIущуллал чулийнмай нанисса ххуллийсса ламу. ЯлунчIил бан программалий буссар Вихьуллал ва ЦIуйшиял дянивсса ламу.
- – Ттигъанну «Фейсбукраву» сукку бувну бия ванияр 4 шинал хьхьичI бакьин бувсса Карашрал шяравунсса ххуллу зия хьуну бур, кIа ххуллу бансса арцу дуркуну, багьайсса куццуй бакьин къабувну бухьунссия тIисса хаварду. ТIайламур бусан, инсантал кув чIумал, дурмунийн щукрулий къабикIайча, къювуну аьйрдах луглан бикIай.
— КIа ххуллул ялув нава цимилагу хъунаманачIан увххун, программалувун бутан бувссия. Биялну уттагу бувну, ххюлгу бивчуну, бакьин бувссия. Ххюва миллион арцул итабавкьуну бия кIа ххуллу бакьин бан. КIану сант дакъасса бур, гьарца гъарал ларчIтари бявххун лаглай бур. Щинаххуллурдугу, чIирттугу бувну, капитальнайну кIа ххуллу бакьин бан аьркинну бур 40-50 миллион харж бан. Ми бигьа-бигьану итабакьин бангу къашайхха, шайрив?
Райондалул бакIчи Юсуп МахIаммадов хъуннасса къулагъас дуллай ур ххуллурдах. КIанал хIарачатрайну чIявусса ххуллурду бувссар Лакрал райондалийн. ЦIахъарату Гъумукунсса ххуллу цуксса ххуйсса тагьарданий бур цIана, ацIра шинал хьхьичI машина гьан къашайсса тагьарданий буссия кIа ххуллу.
Жула зунттал районнайнсса ххуллурду тIабиаьтрал шартIирдацIун къабавкьусса бур. Вана гьашину, тIабиаьтрал апатI хьуну, ламурду, лахIунтту дагьсса ишру хьунни. Ттигъаннугу Сулайман Стальскийл райондалий хьунни мукунсса иш.
- – Ца цамургу цIуцIи кIану Лакрал ва Ккуллал районнал агьалинал: цимирагу шинай ялугьлай бивкIсса ШавкIрату Щаравсса ламу буллай байгу бивхьуну, бацIан бувну, умуд кьукьинсса иш хьунни. Ссайн буккантIиссар кIа ламул иш?
– Мяйжаннугу, сант дакъасса иш хьунни. КIа ламул ялув на навагу чивчуссия «Илчи» кказитрайн. Ца хъун дакъасса райондалийн нанисса кIанттай кIукунсса лагрулул ламу бан арцу итадакьин бигьасса иш бакъассар. Юсуп МахIаммадовлущал жугу хIарачат бувну, Загьид Хучбаровлул, цувагу ламурду буву ухьувкун, чIарах ивзун, хIарачат бувна кIа проект чулийн дуккан дан. Миллиард ва 300 миллион итабакьин ккаккан бувну бия кIа ламу бан. Ухссавнил Ккавкказнаву ттинин къабувсса лагрулул ламурду бансса проектну дуссия кIа.
Проект дуллалиминнан хьхьичIра хIисав къархьуну диркIсса хъяклурду буллай байбивхьуну махъ ялун лирчуну, бацIан бан багьну бур. Сайки шанттуршуннийн бивсса миллион къуруширтталгу харж бувну. Амма, кIайксса арцугу харж дурну, проект чулийн къадурккун къадитанссар, хIукуматрал итадаркьусса арцул жаваб дулун аьркинссар, ми ссанчIав дакъа бат хьун къаритайссар, му суд-диваннахун багьайсса ишри. ХIакьинусса кьинигу кIа ламул ялув пишакартал букIлай, хъирив лаллай буссар. Амма хIакьинусса кьини кIанил ялув балжисса жаваб дулун хъанай бакъар.
- – Барчаллагь, Зиябуттин. ТIайлабацIу баннав вин инара дуллалицири давурттаву! Вихь дакIнийхтуну барча дуллай буру Ххуллурдал зузалал кьини. Му бакъассагу, ина жяматрайн, лакрайн багьайсса сайки гьарцагу ишираву чялишну ва чумартну гьуртту шайсса чув-адамина ура. Кабакьиннав ина дуллалимуницIун Занналгу!
– Барчаллагь вингу, вищал архIал щалва «Илчи» кказитрал коллективрангу!