Октябрьданул 18-нний Дагъусттаннал БакIчи Сергей Меликовлул композитор, СССР-данул халкьуннал артист Мурад Къажлаевлун «Аьрасатнал Федерациялул ЗахIматрал Виричу» тIисса медаль дуллунни.

Ванил хIакъиравусса ХIук­мулий Аьрасатнал Президент Владимир Путиннул къулбас дурну диркIссар гьашину апрельданий. Ва цIа дуллуссар «ПаччахIлугърал ва халкьуннал хьхьичI ляличIисса захIматран лайкь шаврихлу».
Къажлаевлул гьану бивзсса пагьму-гьунар бусса оьрчIансса Республикалул искусствалул школалий хъамал кьамул бунни Аьрасатнал ва Дагъусттаннал Гимнру рурцуну.
Композиторнахь лайкьсса награда барча дурну махъ, Сергей Меликовлул бувсунни ва тарихраву личIансса иш хъана­хъишиву.
– Ва цIа хъинну бусравссаннун ккаллисса душаврияр ххишала, ванил чIалачIи буллали­ссар вил творчествалулгу, оьр­мулулгу виричушиврул ххуллу. Мунияр ххишалагу, хIакьинусса награда дулаврил церемониялул ккаккан дуллалиссар Аьрасатнал Президентнал вищалсса ва вил щалва кулпатращалсса ва Дагъусттаннащалсса ара, – кунни республикалул каялувчинал.
Мурад Къажлаевлул барчаллагь кунни цахра къулагъас даврихлу:
– Ттун ччай бур вийхчIин барчаллагь чин Владимир Владимировичлухь, ттул оьрмулунгу, творчествалунгу, Аьрасатнал культуралуву бивхьусса захIматрангу ваксса бюхттулсса кьимат бищаврихлу. На хIарачат булланна ттинияр тихунмайгу Аьрасатнал ва Дагъусттаннал культуралун ттущава шайссаксса мюнпат биян буван…
Мурад Къажлаев хъана­хъи­ссар Дагъусттаннал профе­ссионал культуралул гьану бивзминнавасса ца. Ванал творчествалул ххуллу байбивхьуссар Бакуй. Тикку ялун уккансса композиторнал къуртал бувссар Бакуйннал консерваториялучIасса музыкалул школа, яла- Азирбижаннал паччахIлугърал консерватория.
ЦIа дурксса маэстрол творчествалул ирсну хъанахъиссар Дагъусттаннал цалчинсса национал балет «Горянка», балет «Шамиль», симфониялул ва джазрал произведенияртту, мюзикллу, кинордансса ва театрдал спектакллансса музыка, вокал произведенияртту. Маэстрол сочинениярттал сияхIрай бур 350-нниха ливчусса произведенияртту, миннувасса чIявуми бувккун бур Аьрасатнаву, Германиянаву, Италиянаву, США-наву.
Мурад Къажлаевлул хIакьинугу цащава шайсса захIмат бихьлай ур республикалулгу, билаятралгу музыкалул искусствалуву. 2010 шинал ванал гьану бивзунни пагьму-гьунар бусса оьрчIансса Республикалул искусствалул школалул.