Гьар шинах щаллагу дунияллий сентябрь зурул 22-сса кьини машинарттай къащябикIай кьини хIисаврай кIицI лагай. Аьрасатнавугу, шиная шинайн тIиссакссагу, ва кьинилул сий хъун хъанай дур. МахIачкъалаливгу, ва кьинилун хасну, хьунни велосипедирттай шагьрулувух буккаву. Велопробеграву гьуртту хьунни 50 инсан, вайннавух бия спортсменталгу, жяматийсса ишккаккултгу, шагьрулул активистъталгу, къуллугъчиталгу. Цала велосипедращал увккун ия мэр Салман Дадаевгу.
Лениннул комсомолданул цIанийсса паркрачIату шагьрулул Хъунмайданнийн дия маршрутгу. МахIачкъалаллал мэрнал бувсмунийн бувну, чIал къавхьуну ва кIанттай велосипедрайминнансса хасъсса ххуллу бантIий бур. Ва проектрал презентациягу Салман Дадаевлул дурну дур Сколковолийсса семинарданий усса чIумал. Велосипедистътурал кьюкьлувусса яла чIаваманан 10 шин дур, МахIаммад ХIажиявдибиров хаварбакъулий хIала хьуну ур ва кьюкьлувун. Ва Аьбдулрашид Садулаевлул цIанийсса школалия тренировкарттая най ивкIун ур, Лениннул комсомолданул паркрачIа велосипедистътурал ккучун ккаккайхту, вайннавух хIала увххун ур. Ва ур велосипед транспортрал яла къулаймур журар тIий. Яла угьарама ур Жамалуттин ГъазимахIаммадов. Ва спортрахун машхулсса, турникрай гьанан икIайсса пенсионер хIисаврай машгьурну ур. Велосипедирттай лагма бувккун махъ, шагьрулул бакIчинал бувсунни шагьрулуву дуван дакIнийсса дахханашивурттая, Лениннул комсомолданул паркрая тIайла хьуну, дяшагьрулий Фазу Аьлиевал цIанийсса скверданучIан бияннин велосипедирттайминнансса ххуллу бувансса ният душиву.
Шиккува бусанну автомобиллай щякъабивкIсса кьини хьхьичIра-хьхьичI Швейцариянаву 1973 шинал дуршиву. Билаятрай бензин ххира хьуну буну тIий, тайннал властирдал маслихIат бувшиву машинарттай мукьва гьантлийсса къазанан. Тания махъ ва аьдат Европанал билаятирттай цIакь хьушиву.
