ХIамид Агъаларов Аьрасатнал премьер-лигалий голлу бавкьуминнаву цалчинмур ххуттай ур. Аьрасатнал чемпионатрал 8 тIуркIулуву ванал бавкьунни 8 ттуп.
Агъаларов Дагъусттаннал футболданул командалуву уклай ивкIссар, цIанасса ппурттуву ва ур «Уфа» клубраву. Уттигъанну хьусса Аьрасатнал премьер-лигалий ХIамидлул гол бавкьунни «Химкилущал» буклакисса тIуркIулуву.
Махъсса 10 официал тIуркIулуву ванал бавкьуну бур 11 ттуп муттаэтурал къапурдавун, миннувату 8 – клубрахлусса тIуркIурдаву ва 3 – Аьрасатнал жагьилтурал командалухлу.
Аьрасатнал цачIундур командалул футболист Андрей Аршавиннул укунсса кьимат бивщунни ХIамид Агъаларовлул тIуркIулун: «Ттул пикрилий, Агъаларов «Уфалуву» личIанссар кIинттулнин. Мунал цува хъин чулий ккаккан увунни – бавкьунни 8 гол «Уфалуву», му бигьасса зат бакъар. Агарда утти хьунтIисса шанма тIуркIулуву 2 гол ттигу бакьирча, му уцинссар Аьрасатнал футболданул цачIундур командалувун».
