Дунияллийх эпидемиялул шамилчинмур щатIи бивщуния шинмай, июль зурул 3-нния байбивхьуну цIуминалийсса ЦIуссалакрал 1-мур азарахана ковидрал госпитальданухьхьун буллуну буссар. ЧIявусса къашайшалт кьамул бансса шартIирдай зун хIадур хьуну бивкIссар шиккусса хIакинтал. Шиккун кьамул буллай бивкIссар республикалул шагьрурдаясса ва районнаясса къашайшалт.
– ХIакинтуран къашайшалт хъин бансса схема лархьхьуну дунугу, цурда азар хъинну макрузансса ва лавмартсса, ччимур чIумал нигьачIисса тагьарданивун дагьайсса дур. Мунияту, хIакинтурал хъин бувну, итабавкьусса къашайшалтрахь бурувччуну бикIияра, прививкартту дара, ххишала азарханалийн къабагьансса хIарачат бара тIисса насихIатру буслайнма буссар», – тIий бур Булбул Исрапилова.
Сайки барз хьунни ЦIуссалакрал райондалул азарханалул хIакинтурал ва яла кIиримур чIумал, «скафандругу» ларххун, къашайшалтрал оьрмурду ххассал буллай. Хъинну захIматну бур хIакьинусса кьини хIакинтуран ссихI итакъабакьайсса костюмру ларххун зун.
Противочумный костюмру лархсса чIумал, хIакинтуран чIу ххуйну баллай бакъар, вайннуву ссихI бигьин захIматну бур, кIиришиву дур, гьухъа битлай бур пластикалул очки. Вай костюмру ларххусса укунасса инсан ацIра минутрава хIалдания лаглай ур, хIакинтал тIурчIа, 6-хъул ссятрайсса сменарттай зий буссар вайннуву.
ХIакинтал бур, жу аьдат хьуну, вайннуву зун вардиш хьуну буру тIий. Шиккува кIицI лаган, инсантал ковидрал къашавай хьуну, азурда хъанахъисса куц чIалай, азарханалул хIакинтурал вакцинартту буллай байбихьусса цалчинсса гьантрайва бувну бур.
– ХIакьинусса кьини жул азарханалий 85 къашайшала ур ковидрал азар лархъун, цаннаяр ца захIматсса тагьарданувун багьсса. ЦIанакул жучIасса къашайшалт ларгсса шиналминнуяр захIматну къашавайсса бур. ХьхьичIава 60 шинал оьрмулува тихунмайсса къашайшалт гьарзану бикIхьурчан, цIанасса ппурттуву чIявусса бур 25 шинава ливчусса оьрмулул инсантал. Жагьилсса инсантурал ва азар хъинну захIматну духIлай бур.
Цивппа рязийну жучIан утту бишин бувкIсса къашайшалт нажагьсса бур. Цуксса кьурчIинугу, инсантал ичIува, цайнува цивппа хъин хъанайгу бивкIун, захIмат хъанай байбивхьуну махъ бакъа, хIакинтурайн буклай бакъар. Хъинну захIмат шай ва азар ххарарххусса сахарный диабет, онкология, гипертония дусса ва бучсса инсантал хъин бан. Гьарицагу азарханалийн агьсса къашайшалан дайссар цанна хасъсса лечение ва багьайсса аякьа. Дузалну бур азхархана цинявппагу дарурттал.
Республикалул Минздраврал ччя-ччяни итабакьай аьркинсса медикаментру. ЗахIматсса тагьарданивун багьсса чIявусса къашайшалтран аьркин багьай реаниматологнал кумаг. МахIачкъалаллал шагьрулул реанимациярттай кIантту бакъашиврийн бувну, багьай мукунсса къашайшалтгу шиккува хъин буллан. Цуксса кьурчIинугу, ва мутталий жущагу ххассал уван къабювхъунни кIия къашайшала», – тIий бур Булбул ХIасановна.
ЦIуссалакрал райондалул ковидрал госпитальданий зий бур 2 смена. Зурул мутталий шиккун кьамул увну ур 303 къашайшала, миннава 214 хъин увну ур. ЦIанасса ппурттуву шикку бур 100 къашайшалансса кIантту, сайки цинявппагу койкартту бур ковидрал къашайшалтрахь.
Азарханалийсса къашайшалт цуксса инжит хъанай буссарив чIалай бур хIакинтуран. Му тагьар хIисавравун ларсун, оьвчаву дуллай бур Булбул ХIасановна, зуллагу, зула мачча-гъанналгу цIуллушиву дуруччаву мурадрай, вакцинартту бара тIий.
