Августрал 4-нний ДР-лул БакIчинал мурадру чIумуйну бартбигьлагьисса Сергей Меликовлул тавакъюрайну ДР-лул ХIукуматрал Председательнал хъиривчу Мурад Казиевлул ххал бунни Гъуниннал райондалийсса «Гъуни» тIисса Республикалул оьрчIал санаторий.
ДакIнин бутанну, июльданул 22-нний Сергей Меликовлул Гъуниннал райондалийнсса аьрххилул лагрулий, санаторийгу ххал бувну, шиккусса диялдакъашивурттаха зунтIишиву баян бувну бивкIсса.
Мурад Казиевлул цащала архIал бивкIсса хасъсса министерстварттал ва ведомстварттал вакилтуращал санаторий ххалгу бувну, амрурду бувунни идаралий цаппара давуртту щурущи дан. БатIаврил хIасиллайн бувну, санаторийлий буллай байбишинтIиссар оьрчIансса цIусса корпус, ва бакьин бувну, цIубуккан бантIиссар санаторийлул лагма-ялттусса парк.
Гъуниннал райондалий ва санаторий зий бусса бур 1980 шиная шинмай.
Шиккун кьамул байссар гьутрурдал азарду дусса, астмалул, бронхирдал инжит хъанахъисса оьрмулул 3-15 шинавусса оьрчIру. Гьарца шинах санаторийлий хъин бувайсса бур 1200-нниха ливчусса оьрчIру.
Ванил каялувчитурал бусаврийну, хIакьинусса кьинилух бурувгун, жулла региондалийсса оьрчIругу хIисавну, санаторий чIивисса, аьркинссаксса оьрчIру кьамул бан каширду дакъасса бур. Шикку гьарта-гьарзашиннагу дурну, паркгу бувну, оьрчIансса куклушиннарду ххи дарча, вайннаща бюхъантIий бур Дагъусттанная бакъасса, Аьрасатнал цайми регионнаясса оьрчIругу кьамул буллан.
Мурад Казиевлул бувсунни, чагъардалмур давуртту къуртал хьувкун, дайдишинтIишиву санаторий бакьин буллалисса давуртту.
Аьрххилул лагрулий ванал мукунма ххал бувунни Гъуниннал райондалул хъунмур азархана.
