Асият Буттаева, философиялул элмурдал доктор:
– Нагу лахьхьу-цархьхьу бував коронавирус къадиянсса вакцина. Жул оьрчIал прививкарду дурна, ичIувагу прививкардал агьамшивриясса ихтилатру хъанай бия. Жугу вирусрая бурувччуну бикIаву мурадрай, оьрчIан ччай бия прививкарду дурну. Жагьилтал нигьа къабусласисса привикардая, жува оьрмулул хъуними циванни нигьа буслан? Ца зумату кунма циняв къашай хьумигу маслихIат буллай бия прививкартту дуван, циван чирча, прививкартду дурминнайн азар диярчагума, миннал тагьар оьнийн дагьлай дакъашиву цанма ккавккунни тIий бия . Ва ялагу, Роспотребнадзорданулгу дувара тIисса маслихIат бур. Навагу даврий зузисса, чIявусса инсантуращал хIала-гьурттусса бухьувкун, даврилшиврий чIярусса командировкартту дикIайхьувкун, бакIран рахIатну прививка дувансса хIукму бував. Дуваннин плюсру, минусру хIисавравун ласав, гьай-гьай. Азардания нигь дакъа къадикIайссар, прививкалул оьнийн дуккавунияр азарданиясса нигь хъунни. Жулла ва жулва ичIувацириннал, лагма-ялттуминнал цIуллушивруяр хьхьичIунсса ва язисса цичIав дакъар, бурувччуну бикIан багьлагьисса замана бур, хIа­кинтурал, экспертътурал тIу­тIимур хIисавравун ласун аьркинсса.
Гьарманан чIа тIий бура цIакьсса цIуллушиву, медициналул зузалтрангу барчаллагьрай чIа тIий бура цIуллушиву ва ссавур! Аллагьу Тааьланалгу кабавкьуну, букканнав жува сагъну, саламатну ва мусиватсса тагьарданува.