ЦIарду чIярусса дур
ЦIурду лархъусса,
Архнийгу, гъаннийгу
Пар-пар тIутIисса…
ТIабиаьтрал дуллу
ХIалимшиврийгу,
Вил аькьилшиврийгу
МахIаттал шара.
Сс. Увайсов

Лавгунни, ахиратрал мурчал лавсун, Дагъусттаннайгу, Дагъусттаннал кьатIувгу цIа машгьурсса театровед, цияр цучIав ялтту къаувксса теат­рал критик, аьлимчу, педагог, жяматийсса ишккакку, ла­кку хъаннил ас ва намус оьтту-ттурчIавува бивкIсса ххаллилсса инсан, АхIмадлул душ Султанова (Чавтараева) Гулизар.
ПартIу-ПатIима цукунсса лакку душ бивкIссарив хьхьичI­ва-хьхьичI Гулизардулли жунма ккаккан бувсса, Лакрал театрданул сценалий сайки чIавану бунува дургьуну диркIсса рольданийну. ПартIу-ПатIимал чувшиву ва узданшиву ванил цивуннагу ларсун дия.
Оьрус мазрал дунияллий ишлану дур «яркая личность» тIисса калима. ТIайлассар, мура калима чIяруну лачIун дуллан бикIай личIисса яргшиву дакъаминнацIунгу. Гулизар­дуцIун тIурча, му эпитет ххишала бакъа бавкьуну чIалай бур. Яргсса чани бивщусса бия ванил щалва оьрмулул ххуллугу, махъра-махъсса кьинилийн бияннин.
Хъирив чаннасса ххагу кьабивтун, личIи хьунни жуятува Гулизар. Лавгунни цила аьзиз­сса ласначIан. ДахIалай чин­сса чутну яхъанай бивкIсса, оьр­мулулгу, ччаврилгу сайки бу­ччиннин Заннал бугу-битсса Кировлул ва Гулизардул цIарду личIантIиссар лакрал агьалинал дянив хIурматрай!

Зу мудангу дуаьлувух бихьлахьиминнал цIания Шалласу Шалласуев