Августрал 18-нний «Дагестан» РИА-лий ДР-лул ХIукуматрал Председательнал мурадру чIумуйну бартбигьлагьисса Батир Эмеев, ДР-лул транспортрал ва ххуллурдал строительствалул министрнал мурадру чIумуйну бартбигьлагьисса Ширухан ХIажимурадов ва МахIачкъалаллал бакIчинал хъиривчу Аьлибулат МахIаммадовгу гьурттусса пресс-конференция хьунни.
Хьунабакьаврил мурад бия гьашинусса шинал республикалий буллалисса ххуллурдая бусансса. Ва агьамсса масъала буссар ДР-лул БакIчинал мурадру чIумуйну бартбигьлагьисса Сергей Меликовлул къулагъасралун лавсунгу.
Батир Эмеевлул бусаврийну, аьмну жулла республикалий ххуллурдал дур 28, 7 азарда км, миннува федерал даражалул ххуллурдал дур 644 км, республикалул ва муниципалитетирттал даражалийсса 7, 6 азарда км ва кIантту-кIанттурдайсса ва кучардайхсса ххуллурдал 20,5 азарда км.
ЦУР-данийн (Центр регионального управления) бучIайсса республикалул ххуллурдал тагьарданиясса агьалинаясса аьрзарду ххал бивгьуну, зуруй цал ДР-лул БакIчиначIа шайсса батIавурттай хьхьичIва-хьхьичI гьаз баймур масъалагу ххуллурдал хIакъираву ци давуртту дуллай буссарив бусласисса ва ми ххал дигьлагьисса бур.
Бувсунни Батир Эмеевлул «Мюхчансса ва ххуйсса ххуллурду» тIисса федерал проектрал лагрулий бан ккаккан бувсса ххуллурду бувну, къуртал бантIишиву ва шинал ахирданийнин. Гьашину бансса ххуллурдан итабавкьуну бивкIссар 2 млрд ва 400 млн арцул. Миннува 1 млрд арцул ккаккан бувну бусса бур МахIачкъалаллал кучардайхсса ххуллурдал 54 км дакьин дан. Республикалул бюджетравагу проектрал лагрулий дансса давурттан итабавкьуну бур 1,4 млрд арцул. ХIакьинусса кьини бакьин бан бур регионнал ххуллурдал 3 км ва 48 ламу.
Билаятрал президент Владимир Путиннул тавакъюрайну, Грознайлия Бущихъавсса ххуллу бакьин баврил хIакъираву Батир Эмеевлул бувсунни, хIакьинусса кьини ххуллу бакьин бувну, шинал ахирданийнин ххуллул манзилданул 13 км асфальт бутIин лирчIун душиву. Билаятрал БакIчинал тавакъюрайну 2020 шинал бакьин буллай байбивхьусса Дарбантуллал кучардайхсса ххуллурдан дукIу итабавкьусса 131 млн арцуцIун, гьашинугу ялун ххи бувну бур 721, 4 млн арцул. ХIасил республикалул ххуллурду бакьин бан аьмну харж хьунтIий бур 11 миллиард арцул.
Бакьин бансса ххуллурду ДР-лул Минтрансрал пишакартурал ссах бурувгун, ци багьана гьанулун лавсун язи бугьайссарив журналистътурахь буслай, Ширухан ХIажимурадовлул кIицI бувна, хъунмурчIин къулагъасралун ласайшиву ххуллул агьамшиву ва агьалинан тIалавшиву .
Масалдаран, цIана бакьин буллай бур туристътал бувцуну заназисса ва миннан нахIу лавчIсса кIанттурдайнсса ххуллурду.
«Уттигъанну Сергей Меликовлущал Гъуниннал райондалийнсса аьрххилия махъ хIукму хьуссар асфальт бакьин райцентрдания Кахибливсса ва Гоор тIисса шяравусса, махъ ппурттуву туристътуран ккаккан гъира бусса къалардачIансса манзилданийхсса ххуллу. Ва маршрут шиная шинайн бусрав хъанантIишиву чIалай, хIукму хьуссар 2023 шинал бувну къуртал бан»,– бувсунни Ширухан ХIажимурадовлул.
МахIачкъалаллал ххуллурдал аьмсса тагьардания бусласисса Аьлибулат МахIаммадовлул кIицI бунни, нацпроектрал лагрулий хIакьинусса кьини ххуллурду бакьин буллалисса давуртту най душиву шагьрулул 96 кучалий. Хъуншагьрулун вай давурттан итабавкьуну бур 400 млн арцул. Вай арцух ккаккан бувсса 96 куча бакъасса, ялагу бакьин бан ккаккан бувну бур 46 куча. Арцу МахIачкъалаллал ххуллурду бакьин бан ДР-лул Минтрансрал тIалав дурну дур АьФ-лул резерврал фондрава.
– Лакрал ва Ккуллал районнал щархъив дахIлахIисса ва бувну, ца чулийн буккаврих ялугьлагьисса Щардал ламу буллалисса давуртту та дуллай цIунилгу сукку хьунтIиссар, – тIисса ттул суалданухьхьун, Ширухан ХIажимурадовлул бувсунни, ламу федерал даражалул къулагъасрайн лавсун бушиву ва аьркинссаксса арцугу итадакьинтIишиву, ламуха зий бивкIсса подрядрал организациялул цала гужирацIух проект дайни итабавкьусса гъалатI ккаккан дурсса чIумуйннин бакьин бувну махъ. ЦIана проектрал хIакъираву ва подрядный организациялущал най бур арбитражрал
