Дагъусттаннай хIукуматрал къуллугъирттал цалла соцсетирдай агьалинаясса аьрзардахьхьун ччясса мутталий жаваб дулаврил чIун кутIа хьуну дур. Июльданий, масалдаран, инсаннал хасъсса къуллугърал соцсетирдаву сообщение чирчуну, 2 ссят ва 13 минутIрава аьрзалул хъирив лавну, жаваб дуллуну дур. Июньдалий тIурча, му чIун 24 минутIрал лахъину дурккун дур.
Агьалинаясса аьрзардахьхьун жаваб дулавриву жулла республика дагьну дур 10 регион дусса ТОП-равун. Ва сияхIрай Дагъусттан бур ряххилчинмур кIанай. СияхIрал бакIрай цалчинминнувух дур Къабардин-Балкьарнал республика, Къарачай-Чаргаснал республика ва Кузбасс.
Щалва билаятрай дянивну агьалинал сообщениярттах къулагъас даврил чIун 4 ссят ва 17 минутI дур. Дагъусттаннайсса ЦУР-данул (Центр управления регионом) «Инцидент Менеджмент» тIисса системалул хIасиллайн бувну, июньдалий агьалиная бувкIун бур 5170 аьрза. Дагъусттанлувтурая хъунмурчIин нанисса рязибакъашивуртту ва аьрзарду бур республикалул ЖКХ-луцIун бавхIусса, ххуллурду оьккисса бушиву бусласисса, газ, чани, щин дакъашиврия ва цIуллу-сагъшивруцIун бавхIусса.
ЦУР-данул зузалтрал августрал цалчинми гьантрайва агьалинаясса 860 рязибакъашивурттал хъирив лавну, ми щаллу дансса хIарчат бувну бур.
Масалдаран, соцсетирдаву МахIачкъалалив Хуршиловлул цIанийсса кучалий щин экьи най дур тIисса инсаннал аьрза, аварий къуллугърал зузалт тIайла бувккун, масъала щаллу бувну бур. ХIайдар ХIажиевлул кучалий хъунмасса ччюрклил бакIу хьун бур тIисса сообщениялийн бувну, мунилсса бансса къуллугъ тIайла бувккун бур. Мува куццуй Исмяиловлул кучалий канализациялул люк тIиртIуну, бахьттагьалтран нигьачIишиву дур тIисса аьрзагу щаллу бувну бур.
