Ва нюжмардий республикалий вакцина бувминнал кьюкьлуву ххи хьунни Дагъусттаннал СМИ-рдал пишакарталгу.
Республикалул кказит-журналлал типографиялул хIаятравунма бувкIун бия вакцинардащалсса мобилсса пункт. ВайнначIа бия кIира ятIапрай байсса «Спутник –V» ва ца ятIапрай байсса «Спутник-Лайт».
Вакцинациялул сакиншинна дурну дия ДР-лул Информациялул ва печатьрал министерствалул ва ДР-лул ЦIуллу-сагъшиврул министерствалул цачIу.
КIицI банну, августрал 9-ннин республикалул СМИ-рдал зузалтрал вакцина бан аьркинссар тIисса хIукму бувну бивкIшиву Дагъусттаннал хъунама санитар хIакин Николай Павловлул цаппара нюжмардил хьхьичI.
ДР-лул информациялул ва печатьрал министр Умароьсман ХIажиевлул кIицI бунни, цIуллу-сагъшиврун нигьачIисса кIанттурдайн гьан-бучIан багьайсса, чIявусса агьалинащал хьунабакьавуртту шайсса журналистътал вакцина баврийну мюхчан баву тIайлашиву.
Буккултрангу кIулну бикIан мукунма кIицI банну, ДР-лул ЦIуллу-сагъшиврул министерствалул бусаврийну чIявуссаннал цIухлахисса «КовиВак» жулла республикалий хIакьинусса кьини бакъашиву.
