Ларгсса нюжмардий ДГУ-лул ректор Муртазяли Рабаданов, гьарца шинах куна, хьунаавкьунни республикалул СМИ-лул вакилтуращал, вузравун буххан ччисса абитуриентътурал чагъарду кьамул буллай байбивхьушиврия бусансса пресс-конференциялий. Журналистътал бакъасса, ванал бусласимуних вичIидишин бувкIун бия ДГУ-лувун буххан ччисса оьрчIал нину-ппу, вузрал цаппара факультетирттал декантал, преподавательтал ва студентътал.
КIицI бувна ректорнал цIубакIрайва гьарта-гьарзану ва агьамсса иширая университетрал сайтрай бувсун бушиву. Приемрал компания республикалул хъунмур вузравун дайдирхьуссар июньдалул 17-нний.
Муртазяли Рабадановлул бусаврийну, гьашину университетравун абитуриентътал кьамул буллантIиссар бакалавриатрал 40 направлениялий, специалитетрал 7 направлениялий ва магистратуралул 30 направлениялий.
«Ларгмур шинах бурувгун, гьашину бакалавриатрайнсса бюджетрал кIанттурду гьарза бувну бур 11%, чансса дахханашинна хьуссар магистратуралийсса кIанттурдал хIакъиравугу. Масалдаран, ва шинал бюджетрайсса кIанттурду ккаккан бувну бур 1431, контрактрайсса кIанттурду тIурча – 2500», – бувсунни ректорнал.
Ванал бусаврийну, гьашину билаятрал университетирттал ва академиярттал ялувсса АьФ-лул КIулшивурттал ва элмулул министерствалул амрулийну, ДГУ-лул цаппара факультетирттайн бухханшиврул ласун ккаккан бувсса ЕГЭ-рал баллу лагь бувну бур. Масалдаран, яла баллу лагь бувмур факультет ва вузраву гьашину бур чил мазурдил факультет. Республикалул школарттай чил мазурдил учительтал биял къахъанахъисса иширацIун дархIусса дахханашинна дунуккар вагу. Шиная шинайн абитуриентътурал дяниву ца яла-яла бусрав хъанахъисса факультет бусса бур информатикалул факультет. ВаницIун бавхIуну шивун буххансса баллугу гьашину лахъ бувну бусса бур.
Хъирив Муртазяли Рабадановлул журналистътурал ва абитуриентътурал нитти-буттал чулухасса суаллахьхьун жавабру дуллуна. КIицI бувна ванал мукунма ци-бунугу цIуххин ччай ягу кумаг аьркинну бучIан ччисса абитуриентътал цал кьамул буллантIишиву гьарца итникьини ва арвахIкьини 14.00 ссятрая зузи кьини къуртал хьуннин.
