Вай ялун нанисса бигьалагай кьинирдай ЦIуссаккуллал шяраву (Новостройрай) хьунтIиссар лакрал щархъал жагьилтурал командарттал дянивсса футболданул цIусса турнир «Кубок Новокули – 2021». Ваний гьуртту хьунтIий дур 17 команда.
Ва ххуллух хьунтIими бяст-ччаллал уттиминнуясса личIишиву му дур – цанна ччисса командалухлу легионернаща, яни цамур шяравасса жагьилнаща, уккан бюхълахъаву. Мисалдаран, Шахьуйннал шяраваллил командалувасса Руслан Жяъпаров уккан най ур Карашрал шяраваллил командалухлу.
Футбол ххираминнайн, турнирданух ябитан ччиминнайн цинявннайнмагу оьвтIий бур Лахияловлул авлахърайн.
Шикку июньдалул 26-нний хьунтIиссар 1/16, 1/8 ва 1/4 финаллал матчру. Хъиривмур кьини тIурча, хьунтIиссар полуфинал ва финал, цавугу чIалантIисса «Кубок Новокули – 2021» турнирданий цалчинсса ххувшаву ларсма.
