Аьрасатнал ПаччахIлугърал премиялул лауреат хьунни Сяъдуллагь Абакаров

Аьрасатнал ПаччахIлугърал премиялул лауреат хьунни Сяъдуллагь Абакаров

Аьрасатнал Президент Владимир Путиннул хIукмулийн бувну, 2020 шинал ПаччахIлугърал премияртту ларсминнал цIарду рирщунни. Премиялул лауреат хьунни медициналул элмурдал доктор, АьФ-лул лайкь хьусса хIакин, Ибрагьимлул арс Абакаров Сяъдуллагь. Ва зий уссар диплом лавсун мукьахсса дуккаврил Аьра­сатнал медициналул университетрал стоматологиялул факультетрал деканну. Ваналгу, 2 цайми аьлимчуналгу, Томскаллал НИМЦ-ний зузисса Евгений Чойнзоновлул ва Москавуллал Сеченовлул медициналул университетравасса Игорь Решетовлул, уртакьну, бакIравусса нярал ва ссурссулий дурухлурду дусса къашайшалт хъин бувайсса кьяйда ляркъуну дур. Премияртту дулунтIиссар вайннан июнь зурул 12-нний Президент Путиннул.


Сяъдуллагь Абакаров уттинингу 2-лла лайкь хьуну ур Аьрасатнал ХIукуматрал премиярттан. Ва Аьрасатнаву ца яла хьхьичIунма стоматолог-ортопед ур. ТтурчIиял ва Чараваллил – кIира шяраваллил арснал билаятрал ца яла хьхьичIунсса премия ласаву щалвагу миллатран пахрулун­сса ишри.

Дагъусттаннал паччахIлугърал мединститут къуртал бувсса Сяъдуллагьлул, аспирантуралуву дуклай унува, дурурччуну дур элмурдал кандидат хьунсса диссертация. 1993 шинал дурурччуну дур докторнал диссертация. 1994 шинал мунал итабавкьусса «Ккарччал протезирттал ттизаманнул конструкциярду» тIисса учебник чIявусса хIакинтурал-ортопедтурал ва ккарччал техниктурал хъинсса кумагчи хьуну бур. Ххюттуршунниха лирчусса элмийсса давурттал ва 11 монографиялул автор ур ва. Ванал каялувшиврий дурурччуну дур кьунияхъайсса диссертациярду. Профессор Сяъдуллагь Ибрагьимович, медициналул элму хьхьичIуннай дувавриву хъунмасса бутIа бивхьусса аьлимчу ушаврицIун, агьалинал оьрмулул иширттавугу чялишну гьуртту хъанахъисса жяматийсса ишккаккугу ур.

Ва Москавуллал медико-стоматологиялул университетрал Диссертационный советрал членни, Аьрасатнал Стоматологиялул ассоциациялул «Последипломное образование» секциялул хъунамари, тамансса стоматологиялул журналлал редколлегиялул членни. Ччя-ччяни лагайссар Аьрасатнал личIи-личIисса регионнайнгу, кьатIаллил билаятирттайнгу конференциярттай докладру буван.

Жунна цинявннан хъунна­сса ххаришивуну хьунни Дагъус­ттаннал цIа-кьини адаврай ядуллалисса ва гьаз дуллалисса язи­сса арснан ларайсса премия дулаву. Шанна-шанна яла кьиматрайми, медициналул элмулул дунияллий сий думи премиярттал лауреат Дагъусттаннай ца ва акъа усса ххай бакъару.
Барча вил премия, Сяъдуллагь Ибрагьимович! ЦIуллушиву дулуннав вихьхьун. Уттиния тиннай дуваймунивугу тIайлабацIу чIа тIий буру.

Аватар

Патимат Рамазанова

Заслуженный работник культуры РД

Читайте также: