Июнь зурул 18-нний Дусшиврул къатлуву ДР-лул Жяматийсса Палаталул хъунама Аьбдулмуъмин Ибрагьимовлул каялувшиндаралу хьунни Республикалул Роспотребнадзорданул каялувчи Николай Павлов ва цIуллу-сагъшиву дуруччаврил министр Татьяна Беляева гьурттусса батIаву. Микку ххал бигьлагьисса агьаммур суал бия республикалий коронавирусрал цIуцIаврил тагьар аьраттал дуккаврил ва вакцинациялул ялувсса.
БатIаврий гьуртту хьунни Жяматийсса Палаталул члентал, 20-ксса жяматийсса ккурандалул каялувчитал, Килисалул жяматращалсса ва СМИ-лущалсса дахIаврил отделданул каялувчи Иоанн Анисимов.
Аьбдулмуъмин Ибрагьимовлул батIаврий щябивкIминнайн оьвчаву дурунни, вакцина цалагу дурну, цала лагма-ялттумигу бакIрай бацIан бан.
Коронавирусрал инфекция цIунилгу анаварсса бущилий ппив хъанай дайдирхьусса тагьарданул ялув ихтилатру бунни Николай Павловлул ва Татьяна Беляевал.
Николай Павловлул бусаврийн бувну, коронавирусрал инфекция цIунилгу ппив хъанай дайдирхьуну дур майрал байранная мукьах.
«Май зурул дязаннив байраннайн миха-тиха бувкIсса агьлу гьарза хьуну, Зумаритавал байрандалуцIунсса батIавуртту, хъатIив сававну цIуцIаву ппив хъанахъаву анавар дурккун дур 34-36 процентрал. Коронавирусрал цIуцIаврищал ва пневмониялущал уттубишин бувсса къашайшалт кIилий гьарза хьуну бур махъсса нюжмардул дянив», – увкунни Павловлул.
Ванал кIицI лавгунни республикалий ссуссукьушиннарду дан багьлай бушиврия баян бувшиву Сергей Меликовлуйн, та муницIун авкьушиву.
Бувсунни июнь зурул 21-нния тиннай баян буллалишиву ссуссукьушиннардая: 65 шинава ливчусса инсантал ва хронический цIуцIавуртту дусса инсантал, вакцина бувми личIаннин, шаппа щябикIан 14 гьантлий, 23.00 ссятрая кIюрххил 6.00 ссят хьуннин дацIан дан машлул центрдавусса жяматрал дукра дукайсса идарарттал даву, хасъсса амру булуннин лакьин оьрчIал клубру, хьхьувайсса клубру, къадагъа дишин хъатIив ва тяхъашивуртту даврий, туристал кьамул баврий.
Павловлул кIицI лавгунни коронавирусрал цIуцIаву дух даншиврул аьркинну душиву дузал дан коллективсса иммунитет, багьлай бушиву ряхцIалунниха ливчусса процент инсантурал яни ца миллион ва шанттуршазара инсаннал, вакцина буван. ХIакьинусса кьининийн тIурча, вакцина бувну бур ттуршазарунниха ливчусса инсантурал.
Татьяна Беляевал кIицI лавгунни республикалийсса тагьар лап захIматсса душиву:
«Ларгсса кьини республикалий уттуишин увну ур 210 инсан. Реанимациялул ва интенсив терапиялул отделениялий ур 112 къашайшала, кислородрал кумаграй ур 502 инсан.
Тагьар захIматсса дур. Гьантлия гьантлийн жунма чIалай бур уттубишин бувсса инсантурал аьдад ххи хъанай душиву. Республикалул бувагу 24 кIану бур цаягу инсан уттуишин къаувну ливчIсса. Ххю-ххюя инсан уттуишин увсса 20 кIану бур, 5 кIану бур ацIунная ливчусса инсантал уттубишин бувсса. Ва тагьар даххана хьунтIиссар, инсантал уттубишин къабувсса кIанттурду личIантIиссар хъинну чансса, бюхъай ливагу-къаличIангу.
Ларгсса хьхьуну ковидрал ивкIуну ур кIия инсан, мукьа ивкIуну ур внебольничная пневмониялул. ЛитIавуртту дяъвилий куннасса дур», – увкунни министрнал.
Ванил бусаврийн бувну, республикалий ххи бувну бур вакцина буллалисса пунктру, зий бур кIанттая кIанттайн заназисса бригадартту.
Иоанн Анисимовлул кIицI лавгунни диндалул вакцина инкар буллай бакъашиву.
Жяматийсса Палаталул хъунаманал хъиривчу Ссапар Аьбдуллаевлул бувсунни арулцIаллий арулла шинал оьрмулуву цалагу бувшиву вакцина.
«Вакцина бува-къабуваврил ялув ттун чIявусса пикрирду буллан къабагьунни. Республикалийссагу, билаятрайссагу, дунияллийссагу тагьар аьлтта чIалай, ттун пикри хьунни я нава, я ттула лагма-ялттуми ва азардануща бурувччуну бакъар тIисса.
Мунияту бував на вакцина, ттула лагма-ялттунайнгу оьвтIий ура, вакцина бан. ХIакьину цуя-ца инсан акъассар ва азардануя урувччуну», – увкунни Ссапар Аьбдуллаевлул.
БатIаврил хIасиллайн бувну, хIадур дурунни вакцина баврил ялув жяматрайнсса оьвчаву.
