Лакрал театрданул чIярусса шиннардий бихьлай бур оьрчIан хъинну ххира хьусса спектакль «Айболит».
А. Усачевлул чивчусса, дакI хъинсса ва къучагъсса Айболит х1акиннаясса магьа ххуйну кьамул буллай бур гъинттулсса лагерьдайгу, Ухссавнил Ккавкказнал шагьрурдайгу.
Вай гьантрай ихIсандалул акциялул лагрулий спектакль ккаккан бунни мушакъатсса ва оьрмулул захIматсса тагьарданий ливчIсса оьрчIан. Акциялул мурад бур му аралул оьрчIру социал оьрмулувун кIункIу бансса.
Ва базилух спектакльданул тамашачиталну бия «Макь дакъасса оьрму» («Жизнь без слез») тIисса дяхттасса идаралий тарбия хъанахъисса мушакъатсса оьрчIру ва нитти-буттал аякьалий бакъа опекунтурачIа тарбия хъанахъисса оьрчIру.
СахIналий хъанахъимур асар хъанай, оьсса Бармалейл луркIандалухьхьун къаирияншиврул Айболит х1акиннан кумаг бан хIарачат буллай бия оьрчIру.
