АрвахIкьини «Дагестанская правда» кказитрал редакциялий хьунни Аьрасатнал МинздраврачIасса урологиялул ва интервенциялул радиологиялул НИИ-рал директор, медициналул элмурдал доктор, профессор Олег Аполихин, Республикалул урологиялул центрданул хъунама хIакин Дибир ХIажиев гьурттусса пресс-конференция.

Олег Аполихин цала пишакартуращал Дагъусттаннайн учIаврил мурадгу бур, ДР-лул БакIчи Сергей Меликовлущал хьунагу авкьуну, «ЦIуллу-цIакьсса аьрасатлувтал» тIисса нацпроектрал лагрулийсса цаппара программарду ва республикалул цIуллу-сагъшиврул аралуву дансса цIушиннарду ххал дигьинсса. Сергей Меликовлущал хьусса хьунабакьаврия буслай, ванал кIицI бувна ДР-лул БакIчинал цала аьрххилул мурадрая рязину усса бувсшиву ва хIадурну ушиву хIукуматрал чулухасса аьркинсса чIарахбацIаву дан.

«ЦIуллу-сагъшиву» нацпроектрал лагрулий жу байбишин ччай буру билаятрал регионнай унгу-унгуну арантурал цIуллу-сагъшиврия. Ва аралуву саргъунсса низам сакин дурукун, хъаннилмур цIуллу-сагъшиврия, яла — оьрчIалмур. Программарду щурущи давриву хъунмур чIурчIав дантIиссар, къашайшала хъин уллалаврий дакъача, азар инсаннахун дахчиннин, азарданул дайдихьу ча най дурив ххал даврий», – бувсунни Олег Аполихиннул.

Ванал кIицI бунни циняр азардал 96 % инсаннал цала зана-кьалашиндарал, оьрму бутлатаврил биялалусса иш бушиву. Масалдаран, медициналул аьлим­турал дурсса хъиривлаявурттайн бувну, къалиян тIисса инсан 10 шинавату, пурпуххилий рак хьуну, азарданул угьайсса ур. 15 шинавату мукуна къалиян тIиманал цIумулий шайсса дур му азар.
Бувсуна ванал, пурпуххилул азарду шиная шинайн жагьил хъанай, хIакиннал кумаг ялу-ялун аьркин хъанай бушиву жагьилсса арантуран.
«Программалул лагрулий дан бакIрайн ларсъсса жул даврил мурад хъанай бур, кIантту-кIанттурдай, пурпуххилул азардал ци иш бурив ххал бувну, му азар сукку хьун ци багьана-савав дурив ххал дансса», – кIицI бувна профессорнал.

ХIакьину Дагъусттаннай пурпуххилул азардал аьмсса ци тагьар дур, цуми районнай, шагьрурдай тагьар къаххуйсса дур тIисса суалданухьхьун жаваб дуллай, Республикалул урологиялул центрданул хъун хIакин Дибир ХIажиевлул кIицI бувна Дагъусттаннай диспансерданул сияхIрайн лавсун ушиву 18 азаллий 284 инсан. Вай хъанахъиссар 100 азара инсаннава 188 къашайшала.
«Пурпуххилул азарду ду­сса къашайшалт, хъунмурчIин, жул кумаг аьркинну бучIай ТIиларатIиял, Рутуллал, Кьурагьиял, Бущихъиял, Гумбетуллал районная. Дурсса цаппара хъиривлаявурттайн бувну, ми районная миксса къашайшалт циван бучIайсса бурив кIул буллан бивкIукун, багьана-сававну лякъай гикку ишла дуллали­сса щин. Ва так ца сававри. Пурпуххилул азарданул угьавриву укунсса багьантту ялагу цимигу буссар», – увкуна хъун хIакиннал.

Пресс-конференциялул ахирданий ДР-лул информациялул ва печатьрал министр Оьмарусман ХIажиевлул, Москавлия­сса хъамаллурахь жулла республикалий ва хъуннасса даву дайдишин дакIнийн багьаврихлу барчаллагьгу куну, вайннан Дагъусттаннаясса ссайгъат хIисаврай, республикалул тарихраясса, культуралиясса, миллатирттал касмурдаясса ва дуки-хIачIиялиясса луттирду пишкаш бунни.