Ссутнил тIутIив

Ссутнил тIутIив

ДуркIун хьхьичI дацIарчагу

ДуркIун хьхьичI дацIарчагу
Дулттиял лахъазанну.
Битанна на кIай занчру,
Так вичIаннив иянна.

Жула дянив хьурчагу
Каспиял щюлли щатIив,
Хьхьири щала хIачIанна,
Так иянна вичIаннив.

Къаанссара на аькъин
КIинтнил дякъил къиялул,
Так, дуллуну ттун эшкьи,
Гъили бува хияллу.

ХIучI къачинна, хьхьичI ацIлай
Ттуршазара Дон Жуан.
ДакIцIуцIултрал цIу рутлай,
Къабаннав талихI лиян.

«Илчилул» редколлегиялий

ХхунххутIи

ЯтIул ххунххутIул чичру –
Щюлли яхъай накьичру:
Рангру яргсса ва тунтсса –
Я батIин къашай ттуща!

ЯтIул гьухъуйх бивчусса
ЛухIи ххаятIилущал
Цалчин га бурувгнийва
Ца бухар бувхсса ххива:
Га бия ххаллил тIутIи,
Тунтну ятIул ххунххутIи –

ДакIниву лавхъсса чирахъ,
БакIран – марцIсса тарияк*…

БювчIун кIичIалттал дюрхъу
Хъахъи рирщу къурухъу.
Хъунил дянив ххунххутIал
Бувтун бур ятIул ххютIа.
Ттуйн, апатI аршибакъуйн
Кунна, оьвтIий дур га хъу.
Базурдаву бур асар:
«ЯтIул гьухъа бухьунссар!»
Пикри тIий буна: «Ссавур!» —
Ликрими лечлай най дур.
Ивунна хъунил дянив –
Къабувнни ккаккан нясив
ТIутIаву ххаллил тIутIи,
Тунтну ятIул ххунххутIи,
ДакIниву лавхъсса чирахъ,
БакIран – цила тарияк».

Ттул дус ттул мажнун* хьусса
ДикIул дакIнин лавхьхьусса
Дарув буван кьасттиран,
Ур ттухь насихIат буслай:
«ХхунххутIигу тIутIирив?
Ххуйсса кIюла чIапIиврив,
ЛухIи, ятIул бакъасса?
Кьанкьгур цил къатIааьнсса.
Тариякри* бакIрансса».

Щавщилущал щурщулий
Марщай дуссар тIуркIулий
ЯтIу-лухIи ххунххутIи,
Рангру дуллай къавтIутIи.
Агь, ттул дус, му ци махъри,
Мугу ци тариякри!?
ХхунххутIилуяр ххуйсса
Чуврияр тIутIи дусса!
Ттул хиял бур мудансса –
ЯтIул гьухъа ккаккансса:
ТIутIаву ххаллил тIутIий,
Тунтну ятIул ххунххутIий,
ДакIниву лахъи чирахъ –
Хьувча бакIран тарияк!

КьукIма-Зунттуй

Агь, тIутIан тавт КьукIма,
ТIутIан тавт КьукIма
Ссалливаври бувсса
Вакссава къума?
Дур азарва Яну
Вил валтту чIалай,
Азаруннивагу
Арцул щин цIалай.

Агь, кIай арцул щинну,
КIай арцул щинну,
Бургъил тIинттаву цив
ЧIалайсса хъинну:
Щюллисса бакIбахIуйх
Дирчусса чарсри –
Рав-рав* накьич ххуйри,
ЦIай-цIайгу марцIри.

Агь, КьукIмал бизанттай,
КьукIмал бизанттай
Дур ранг хъапа бивщу
Щюллисса дарай.
Жюр-жюр тIий рахIавух
Нани кьурукьрув,
Ва ххаллил тIабиаьт –
Ми ци анцIукьрур*?

Агь, КьукIмайсса тIутIал,
КьукIмайсса тIутIал
КIюрххих бутIлатIисса
КIай хьхьемал кIунтIал
Алмасрал кунмасса
Пар-пар тIутIаву,
Хьюму муси кунма,
Ккур тIий нанаву!
Агь, ца оьрчIи гъарал,
Ца оьрчIи гъарал
Чях кунни ссавния –
Дакъари кьарал.
Ссал хъювсул дурссар ссав,
Ссал дурссар гьалак,
Бивт бургъилу рутIлан
Лайсал гъарал макь?

Агь, ссурулккурттамур,
Ссурулккурттамур
Ряхрагу рангирал
ЧIюлусса ччал бур:
ЯтIул, наранжи ва
Хъахъи – хъяхъаву;
Щюлли, някI, банавша –
Хъювхъу тIутIаву.

Агь, Хъусрал ххаллил душ,
Хъусрал ххаллил душ,
Инагу ссал бувра
Муксса дамагъуш*?
Вил дакI аьраттал дай
Му къумашиву
МарцI мукьал аьтарттул
Ларсун лагивуй!

Гъумучиял кIялагьив

Хъюлчай тIий бур кIялагьив
Гъумук бярниккурккайсса –
Ва нартътурал кьюкьарив
Изажа* ябуллайсса?

Хъюлчай тIий бур кIялагьив
Гъумук бярниккурккайсса –
Ссав, вай хьхьевхьхьевтIалалтрив,
Вин дюхлу хьун дуллайсса?

Хъюлчай тIий бур кIялагьив
Гъумук бярниккурккайсса –
Я чаний, вай карурив
Лухччинул вин тIитIлайсса,
Вийн хъямала дагьлайсса?

Хъюлчай тIий бур кIялагьив
Гъумук бярниккурккайсса –
Суратчинал пилчраллив
НякI ссавнил чатандалий
КIяла ттурлу дихьлайсса?

Хъюлчай тIий бур кIялагьив
Гъумук бярниккурккайсса –
Лахъ ссавния Занналлив
ЛухIи ттурлу дахьлайсса?

Хъюлчай тIий бур кIялагьив
Гъумук бярниккурккайсса –
Хханссар ххаллил ссурухIив,
КъавтIий, мандил* дуллайсса?

Хъюлчай тIий бур кIялагьив
Гъумук бярниккурккайсса –
Ттуршазардахъул мурччив
Хханссар цал щюлли чIапIив,
Ччаврил щурщу буллайсса?

Хъюлчай тIий бур кIялагьив
Гъумук бярниккурккайсса –
Ва иттархъеннал щарив,
Пиш тIий, я вив ласлайсса?

Агь, кIялагьив, кIялагьив
Гъумук бярниккурккайсса,
Цив ккавккукун, ттул дакIний
Буруккин къаличIайсса!

МахIмудил кару

Хъя-хъа кусса хъархъаллу –
Кьукнив хъахъи аьрщарай.
РахIму бакъа гъараллу
ЛачIлай дяххан дур щяллил
МахIмудил хъала кару
ДацIан дай ттул итталу.

Акъасса бувсуна ттухь.
Уссар, увкуна, цулуй.
Авчура дурцу урттул
Щару багь Ттуккул КIуллуйн –
Вана МахIмудил кару
ЧIиникI бишлай диркI кIану.

ЧIюйлуйх яларай дурккун,
Хьхьев-хьхьев тIий дур чIаракIлу.
Кьункьув ххалал кьанкь дурххун,
Чаяр увнна гьалак на.
Хьурдай ттун ххалал шану,
БакIрацI – МахIмудил кару.

Ххал хьунни чIал къархьуну
«Панамка» бу хъархъала,
ЧIиникI тинмай бивхьуну,
Ттуйн дагьунни хъямала:
Дирчуну хъуни кару,
Авкьунна на хъаралун.

Нава оьрчIну ивкIсса чIун
ДакIнийн дагьунни тти ттун:
Ххуллу, чявхъа бивчуну,
Зивзуну бия интту
Мурзу Оьщамаралу,
Амма МахIмудил кару
ЛиркIуна нигьиралун,
Кьайлул бакI хьуну дурцIу
Аьрава вярттурала
Ларсун, къакуну зурзу,
Лахъан дурна цалалу –
Вайри МахIмудил кару!

КIиссурттай – дякьру-дякьру,
Пялутрал матIив кунна,
ГъунчIарисса витIянхъру
НенттабакIну тIиртIунна.
Завулул чивчусса лу
Хханссар МахIмудил кару.

Ссурссуссар хIухчил кIунттил
Ттархьру цив вацIауксса –
Баралун вана кьуртти.
Аммарив къадюрчIуссар
МахIмудил кьянкьа кару,
КIулсса захIматрал кьадру.

Хъя-хъа кусса хъархъаллу
ДикIай ччимур аьрщарай.
РахIму бакъа гъараллу
ЛачIлай дяххан дур щяллил
ДацIан дай ттул итталу
КIа буттал шяравалу –
ХхялчIив къатрал магъайсса,
Ччинну ттарацI ччар дайсса,
Гьаллу щинну дачайсса,
Нигьру Бугъал марщайсса
Зияратирал чару,
МахIмудил хъуни кару.

Вил кару

Лагабургъил тIинттал мусил гъаралу
Вил исвагьи кIисри бур уртту дурчIлай,
Интнил гьаваслансса щюлли макьанну
Гай щюлли синттая экьи гьан дуллай.

Лагабургъил цIарай бур кIункIур щарай,
Ялув къиссу буллай дур кьалакьигу.
Вил магьирсса кIисри бур ххункIру буцIлай,
Гурсундалул* кунна, дишай накьичгу.

Баргълагавал чулух щюлли зунттул хъачI –
МаркIачIан дуркIукун, цув цIан ларгунни.
КIа хъачIнил махъ лархъун банавшасса кIач,
Бургъил циняв мусий кIийх лариртунни.

На мискин къаара дакъахьу мусил,
КIунттиву дуссаксса вил кIукIлу кару
(Я ттул заллу, вайннул тIааьншиву цир!),
Вил иминсса кару – хияллал хъару.

Хъяхъа цан чайривав

Хъя-хъя цан чайривав интту ххуй тIутIи,
Кьакьан тIий дунура гъинтнил бугъливу?
Щалла тIабиаьтран кIулну буну тIий,
Ссут ларгун, кIи ларгун, инт дучIайшиву.

Хъя-хъя тIий жувагу личIанссару тти,
КIидачIин къахъанай дакIнил кIушиву,
КIулну тIий, гьанайнма бунугу цIуртти,
Жулламур цIусса инт къадучIайшиву.

Лакку билаят

Агь, Лаку билаят – ттул рухI, ттул иман,
Ттул дакI вийн тIайлану дуссар даиман.
Вил аьрщараяра увну уссагу,
Вил аьрщарайнна на уккантIиссагу.

КъабивкIссар Лаккуй цив ххаллил чIалъаьрду*,
Я хIайран увансса хъуни гьайкаллу,
Я чивун ццах бутай азгъун къаларду –
Цив бивкIссар чинссагу дакъар эяллу.
Дуссар Лаккуй някI ссав, щюлли бизантту,
Марххалтту бюхттулсса барзунттай цIай тIий,
ХъачIайх дагьну нани марцI жюружантту* —
Вай гьарзат ца чIуний дуссар балай тIий:

Агь, Лаку билаят – жул рухI, жул иман,
Жул дакI вийн тIайлану дуссар даиман,
Вил аьрщараяру бувну буссагу,
Вил аьрщарайнну жу буккантIиссагу.

Ява, гоьа, хIурма трай биза щяв му ччан!
Му бивзсса ппухъруннал ттурчIардийрихха –
Къахъунмассарихха ва жула улча,
Чув къавччу кIану бакъассарихха.
Аьрщарай пиягьру ххал шайрив – ургу! –
Га бурсар, буттахъал бувтI оьттул бурсар.
ВичIи диша – балай буссар ца гургу.
Гагу буттахъал чIур. Га вихь тIий буссар:

Агь, Лаку билаят – жул рухI, жул иман,
Жул дакI вийн тIайлану диркIссар даиман,
Вил аьрщараяру бувну бивкIссагу,
Вил аьрщарайнну жу бувккун буссагу.

Найнма буссар Лаккуй кIайва мугьалтту,
КIавар Лаккуй бяргъгу, цIурттигу, барзгу,
НякI ссавний бюхттулсса барзунттал ялтту
Гьава буллай буссар тархъан барзугу.
Дуссар Лаккуй ттигу кIара аьрщигу
Бусравну ядурсса цIакь чиваркIуннал,
Муртазаьлил рухIгу дуссар уттигу,
Вай махъру тIий, журат рутлай жувунна:

Агь, Лаку билаят – ттул рухI, ттул иман,
Ттул дакI вийн тIайлану диркIссар даиман.
Вил аьрщараятур чиваркI бувкссагу,
Уттиния тийнмай буккантIиссагу.

Чагъар

Чичлай ура вичIан вай ца-кIива хха,
Вин загьир дана, тIий, ва ттулла ччаву,
Ччуччин буллалисса щала ттул хханхха
Лещан дан къашайсса оьсса цIараву.
Чичлай ура вичIан вай ца-кIива хха,
Вайннул мяъна личIин вища хьунссархха.

Чичлай ура вичIан вай ца-кIива хха,
Вин дурчIайрив ккаккан ттул ччаврил азар,
Ванинсса дарувгу бусса вихьвархха,
Ва хъин дан шайссагу анжагъ ца вищар.
Чичлай ура вичIан вай ца-кIива хха,
Дарман шайрив ккаккан, ай-баликирхха.

Чичлай ура вичIан вай ца-кIива хха,
Лажинни, ттул аьзиз, бува ца чаран.
Ттул оьрму – так кIива мукъул зумархха:
«Юх» бур ттунсса ажал, «ди» — дакIнин малхIан.
Чичлай ура вичIан вай ца-кIива хха,
Ччаву тIисса махъгу ина тIиссархха.

Халид-багнал1 балай

Бутталхъал заманнай оь марцIсса чIумал,
Зунттаву оьрчI-вирттал хIуррисса* чIумал1
Алвагьну яхъанай лак бикIайссия
Бюхттулсса барзунттай барххулт укунма.

Агарда ххяххарча аскисса душман,
Миллатрай рухI дишин кьаст хьусса душман,
Цинявппа цахьуну, хьхьичI бацIайссия,
Оь душман лиян ан, дуруччин Ватан.

Ванна ттигу ххяхлай аьсийсса* чапур,
Къанч цIакьлин бувгьуну, чапхун дакй чапур.
Бачира, жям хьира, душман ххит уван,
Буттал кIанттуйх бакьин чаннаннил Буцур.

Кьюкьрайх бавцIуну бур Гъумук гъазитал*,
Чурхругу аьраххан бувсса гъазитал,
Букан бува, Халид, мицI мусил байрахъ*,
Вих ялугьлай бурча лакрал оьрчI-вирттал».

Арсурваврайн оьвтIий бур буттал улча,
Тархъаншиврух мякьсса аьзизсса улча.
Дуккан дува, Халид, кIама* мусил тур,
Оьттул ттур дайдишай ссят дирну дурча.

1 Сурхай хан II Хъун буттал кIилчинма арс, ххаллилсса аьралуннал бакIчи, машгьур хьуссар оьруснащалсса дяъвирдаву, хаснува Гъулудиянаву (тти заманнул Закаталлай) генерал Гуляковлущалсса дяъвирдаву, ивкIуссар Хъусрал Аьралиялий генерал Мадатовлущалсса талатавриву 1820 шинал.
Вай кIи-кIива хха буттахъал балайрдаватусса ххарур.

Читайте также: