Ларгсса ххуллункьини, Расул ХIамзатовлул цIанийсса Национал библиотекалул конференциярду дай залдануву, шаэр ва таржумачи Ризван Исяевлул «Адамина» тIисса луттирал презентация хьунни. Авторнал ва лу хас бувну бур цала буттан, шаэр Адам Адамовлун, ванан 90 шин шаврил таварихрацIун бавхIуну.
ХьурукIуллал шяраватусса Адам Адамовлул назмурду чичайссия лакку мазрай ва оьрус мазрай. Оьрусрай ванал итабавкьуну бур ацIниясса луттирду, лакку мазрай итабавкьуну бур «Барзул гьава» ва «Барзунттай чаннацIуку» тIисса луттирду. Буттая ирсирай шаэршиврул бутIа бивсса Ризваннулгу оьрус мазрай ацIунниха ливчусса луттирду итабавкьуну бур. Ва цIуну итабавкьумур луттираву шаэрнал цIусса назмурдугу дур, ванал оьрус мазрайн таржума бувсса Дагъусттаннал шаэртурал шеърирдугу, бур проза ва публицистикагу. Презентациялий ихтилатру бунни шаэртал Аминат Аьбдулманаповал, Хизри Юсуповлул, профессор Асият Буттаевал, аьлимчу ва чичу Александр Карапацлул, ДГУ-лул студентътурал. Шиккура Адам Адамовлул ва Ризван Исяевлул творчествалун хас дурсса луттирдал выставкагу дия.
