Ларгсса нюжмаркьини Да­гъусттаннал муфтиятрал конференц-залдануву республикалул муфти щайх АхIмад-хIажи Аьбдуллаев хьунаавкьунни лакрал интеллигенциялул вакилтуращал.

Ва хьунабакьаврил сиптачиталну бия Муфтиятрал полпред Шамил БахIандаьлиев ва ДГИ-лул преподаватель, философиялул элмурдал доктор Асият Буттаева. Ванил цилва ихтилатраву кIицI лавгунни республикалий чIярусса шиннардил лахъишиврий агьали, динну ва миллатру личIи къабуллай, кувннал хIурмат кувннал буллай яхъанай бушиву ва вара тагьар цIакь шаврил ххуллий цилва маслихIат бувшиву цу­ппа зузисса Дагъусттаннал Гуманитар институтравугу исламрал кIулшивурттащал архIал ххачпараснал ва ягьудинал диннугу лахьхьин дуллан. ЧIяву миллатру бусса ва динну чIярусса республикалий нахIуну, бавкьуну къуццу тIутIавриясса, жагьилтал рувхIанийсса ххазинартту хьхьичIунну тарбия бавриятусса, исламрал кIулшивуртту куртIгу, цIакьгу дуллан аьркиншивриятусса бия ихтилатругу, гьаз буллалисса масъаларттугу.

Муфтиналгу чIурчIав дурунни ялун нанисса никирахсса дагьайкунсса къулагъас, аякьа хIура дуккан ритан къабучIишиву. Бувсунни машгьурсса аьлимтал, щайхтал ва динчитал бусса лакрал миллатрал хIурмат цачIава личIинува бушиву. КIицI лавгунни НицIавкIратусса щайх Сайпуллагь-Кьадинал багьа бищун къашайсса кьиматрайсса давуртту дуршиву, ванал кьабивтсса мюнпатсса диндалул ва элмулул даража лахъсса бушиву.

– Ттун ххирар щайх Сай­пуллагь-Кьади. Мунал аьраб мазрайсса ца даву дур 950 лажиндарайсса, лу итабакьиннин жу ва дурккуссар ацIния кIийлла. Учин ччисса мура, ва мисал буцаврийну Сайпуллагь-Кьадинахсса ччаврил хIурматра ккаккан буллалисса. Гьар каснал инсаннал оьрмулул ххуллу, тарих куртIну лахьлахьаврийну мунахсса ччаву аьч дуллалиссар, – увкунни муфтинал.
Гьаз бунни хьунабакьаврий «Сайпуллагь-Кьадинал оьрму ва творчество» тIисса луттирал конкурс даврил хIакъиравусса суалгу, щайхнал ва даву хъин чулий ккарккунни, конкурс цурдагу республикалул лагрулийсса, лайкьсса даражалийсса хьун аьркинссар увкунни. Хьунабакьаврий гьуртту хьуминнал АхIмад Апаннинахь исламрал элмурду ва кIулшивуртту ларай дуллалисса пишакартал хIадур буллалаврихлу, коронавирусрал ппурттуву чIявусса инсантуран дуки-хIачIиялул кумаг буваврихлу барчаллагь тIутIисса ихтилатру бунни.

– Зу увкуцири ххуйсса махъру зуйнма цинявннайнмагу зана бикIлакIисса, зуйнмагу багьлагьисса махърур, жува уртакьну зий буну тIий. Ттуща ттущаралу цичIар дан къашайссия, зу хIала-гьурттуну бакъания. Аллагьнал жухьхьунна сант дуллунни жуйхвачIин халкьуннан мюнпатмур буллангу, жулва барчаллагьгу Аллагьу Тааьланайнни», – кунни АхIмад-хIажинал.
ДГИ-лул теологиялул ва социал-гуманитар дисциплинардал кафедралул хъунама преподаватель ХIасан ХIасановлул пишкаш бунни муфтинан цалва чивчусса лу, «Кьурандалул маякру» тIисса. Мукунма халкьуннал шаэр Юсуп Хаппалаевлул луттирду буллунни шаэрнал душнил, «Зунттал хъами» журналданул редактор Аьжа АьбдурахIмановал. «Дараччи» фондрал хъунмур Гульшан Хасаевал буллунни Мариян Илиясовал оьрмулиятусса луттирду. Муфтиналгу хъамаллуран хIадур бувну бия ххуйсса луттирду. Мукунма исламрал диндалул ххуллу-ххуттайсса давурттаву чялишну гьуртту хъана­хъисса цаппара хьхьичIунминнан – ХIасан ХIасановлун, Гульшан Хасаеван, Тамара Закарьяеван дуллунни чIирай лахъай ссятру. Муфтинал каруннища мукунна­сса бахшиш ласунсса тIайлабацIу хьунни ттунгу, Аллагьнайн щукру. Умуд бур ва хьунабакьаврил барачат щалвагу миллатрайн биянссар тIисса. Бияннав тIисса дуаьгу дуллай, дакIнийхтуну барчаллагьрай буру ва мюнпатсса, Аьжа АьбдурахIмановал тIийкун, жулла «дакIурдинсса байранну» хьусса ва хьунабакьаву дуван биялсса захIмат бивхьусса Асият Буттаевайн.