Ванил цIа, циваннив, ттинин къаитталу кунна лирчIун чIалай дур

Щалвагу Аьрасатнаву цIа ларгсса жулва лакку душнил, музыкалул дунияллий яргсса кIану бувгьусса цIанихсса пианистка, Дагъусттаннал халкьуннал артистка, РСФСР-данул магьирлугърал лайкь хьусса ишккакку Аза Аминтаевал (1920-1997) юбилей дукIу лях ларгун ляркъунни. Ва иширал хъиривлахъу бан кунма, бусанну чанну-ххину СССР-данул халкьуннал артист, дунияллийх цIа ларгсса музыкант Мстислав Ростроповичлущал 20 шинал мутталий зий бивкIсса Аза Аминтаевал оьрмулия.

Ванил ппу, цIанихсса парашютистнал, цимилагу дунияллул чемпионнал цIанин лайкь хьусса Наби Аминтаевлул уссу ивкIссар. Бувну бур Аза 1920 шинал хIакин-хирургнал МахIаммад-Загьид Аминтаевлул кулпатраву Вдадиккавкказрай.
Цалва концертмейстерная укун увкуну бур Ростроповичлул: «Аза МахIаммадовна цIа дурксса музыкантри, ххаллил­сса пианисткар. Ва жулва музыкалул пахрур ва дагъусттанлувтал гьунар бу­сса агьлу бушиврул яргсса барашиннар».

---

[dropcap]Ч[/dropcap]Iярусса шиннардий Аза Аминтаева
Мстислав Ростроповичлул концертмейстер­ну
зий бивкIун бур.

---

Дагъусттаннал 50-ку ва 60-ку шиннардийсса кказитру ххилтIу буварча, виолончелист Ростроповичлул МахIачкъалалив Дагъусттаннал филармониялувусса концертирттая бусласисса информацияртту бакIрайн багьантIиссар. Таний Ростропович машгьур хьун увану ивкIссар. Жулва шагьрулий классикалул музыкалул кьимат кIулссагу чIявусса ба­къахьунссия. Дагъусттан ванан ххира хьуну бур Аза Аминтаева сававну. Билаятрал яла хьхьичIунсса П. И. Чайковскийл цIанийсса ПаччахIлугърал консерватория къуртал бувсса Да­гъусттаннаятусса цалчинсса инсанну хъанай бур ва цуппагу. Ванил бюхъу-гьунар чIалай, Аза тиккува консерваториялуцIунсса училищалий преподавательну зун бувцуну бивкIун бур. Тара чIумал консерваториялул жагьилсса профессор Ростроповичлущал кIул хьунсса тIайлабацIугу хьуну бур.

ОьрчIнийва, оьрмулул мяйра шинаву, ва музыкалул чулуха итххявхсса, гьунар бусса душ МахIачкъалаливсса музыкалул хьхьичIва-хьхьичIсса школалул директорнал Готфрид ХIасановлул ученица хьуну бур. 1937 шинал Москавлив дуклан гьан бувну бур. Чайковскийл цIанийсса щаллагу дунияллул халкьуннал дянивсса пианистътурал цалчинмур конкурсрайва ххув хьуну, лауреатнал цIа ларсун дур ванил. Тайра шиннардий ва концертру ккаккан дуллай бивкIун бур, машгьурсса совет композитортурал Д. Шостаковичлул, А. Хачатуряннул, Д. Кабалевскийл, Б. Чайковскийл, Л. Книппердул, А. Бабаджаняннул ва кьатIаллил билаятирттал композитортурал Б. Бриттеннул, А. Согэл , А. Жоливел, И. Пауэрдул ва цайминнал произведениярттая агьали неъмат ласласи буллай.
ЧIярусса шиннардий Аза Ростроповичлул концертмейстерну зий бивкIун бур. Ванал кулпат Галина Вишневскаял «Галина» тIисса луттираву Аминтаеваягу бувсун бур. Вана ца парча: « Гъинттул нагу, Славагу (ихтилат Ростроповичлуятур) Бенджамин Бритт ва Питер Пирс Арманинаву бигьалаглай буссияв. Жущал Славал концертмейстер ва жула гъансса дус Аза Аминтаевагу буссия. На гьар кьини, цимирагу ссятрай, ванищал зий бикIайссияв Шостаковичлул опералуха.

Ттун Дмитрий Дмит­риевич рязийну личIансса куццуйсса даву хьуну ччай бия, мунияту, кьинил-кьинибархан опералул балайрду тIий, шайссаксса хIарачатрай бикIайссияв. Ххаллилсса пианистка Аза Аминтаевагу ва опералух эшкьи хьуну бия. Славал Азайн Ося учайва. Ва кIиз лухIисса, мурччал ялтту цIансса щагу бусса, ябацIансса дагъусттан душ бия. Дилижаннай жу ца къатлуву яхъанай буссияв. Ца ппур­ттуву Аза шанашисса къатлувун увхсса Славал ца гьуя кунни: «Иосиф Виссарионович!» – куну. Хьумур къабувчIлачIисса Аза, дакI хъякуну бивзун, цIитI бивкIунни, бувагу ци хьурвав тIий. Ва нигьа бусан бувсса Славама уссар хъяхъаврил ивчIавай, «Йоська!…Ося! Вил Сталиннуха лащаву …» тIий. Тания мукьах циняв бавчуна Ося тIий. Ча, кьинирдал ца кьини нагу, Осягу Жуковскалийсса жул дачалия Дмитрий Дмитриевичлул дачалийн най буссияв. Ттул дакI гьулусанну, ват-ват тIий ришлай дия, кьабагьну най бура, гьалаксса асарду чурххавух гьанай бухьувкун.

– Гьуя, Галяй, ттуву оьккисса ццахханну дур, нигьа бусаврил лякьагума цIий дур…тIий бур чIарах нанисса Оська, кьакъабагьавай.
– Кьабагьу, вил дахьра лякьа цIий духьурча, ттул гьарзат цIий дурча, оь щарай бурча, – тIий бура. Жуй аьйгу дакъая, ттун ва Оськан цува Шостаковичлул хьхьичIун буккан багьлай бия, ттун – балай тIун, ванин – макьанну руцин. Жул Дмитрий Дмитриевичлущал дусшиву дуссия, духьурчагу, дусшиву – дусшиврул ххуллий, даву – даврил ххуллий. Шостаковичлул хьхьичIун бу­кканнин цинявннавун нигь дагьайва. ХIатта щиячIав тачIав нигь дакъасса Славангума».

Манашир Якьубовлул макьалалуву бувсмунийн бувну, Ростроповичлун ва Вишневскаян кьатIаллил билаятрайн гьан багьайхту, ватандалийн хаин хьуми хIисаврай, гражданствалуцIагу бувну, тайннащалсса дахIаврий къадагъа дишайхту, Азал, хъунасса артистнащалсса дахIаву къакьариртун дур, чагъарду чичлай бивкIун бур таначIан, увсса кьини барча дуван телефондалувух оьвчайсса бивкIун бур. Ванин вай чагъарду чичавуртту ва оьвчавуртту лап ххирану дарцIунугу дур. Ва нигьачIакIул буллай бивкIун бур, ина душманнайн циван оьвтIий бура тIий. «Ттул политикалущал ци ишри, Ростропович ттул дусри, даврил уртакьри, увсса кьини, ягу ЦIушинал байрандалий циванни барча уван къабучIисса, дус барча аву оькки­шивурив?»–тIий бивкIун бур Аза Аминтаева. Амма му дахIаву ванин багъишла къадурну дур, даврицIагу, карьералуцIагу бувну бур. Рост­роповичлун бувчIлай бивкIун бур хъанахъимур. Ва, ичIува рояльвагу бакъа, лащинну яхъанай бивкIун бур. Дунияллийх цIагу ларгун, машгьургу, авадангу хьусса Ростроповичлул ванин кьатIаллил билаятрая багьлул ххирасса рояль гьан бувну бур. Амма хъирив дарцIусса властирдал мукунсса бахшиш залунначIан диян ритайссияв, сайки рояльданул багьасса налог тIалав дурну дур Аминтаеваяту Шереметьеволий. Ча дикIанссия ваничIа миксса арцу, рояльгу таможнялийва бацIан бувну бур. Ростроповичма гьар мудан цIухлай ивкIун ур, инструмент ххуйвагу бивзрив, бахшишрая рязинувагу бурав тIий. Суаллая лихъла­хъаврил шацI хьусса Азан бусан багьну бур рояль къаитабакьлай бушиву таможнялул. Ростроповичлул цалла дуллуну дур налоггу. Азал чIивисса квартиралий кIилийнусса багьа буллусса рояльгу хьуну бур, инструмент бувсса фирмалул цIа дикIайсса кIанттай «Оська» тIисса чичругу дусса, «Стейнвей» фирмалул рояль. Шиккува бусан, ва бивкIун бур Ростроповичлул Совет Союзрайн гьан бувсса кIилчинмур рояль. Цалчинмур гьан бувну бивкIун бур цува заллусса инструментвагу бакъасса бюхттулсса совет композитор Шостаковичлун, 60 шинал юбилейрал бахшишран.

УрчIцIалку шиннардий, Ростропович Аьрасатнавун зана шайхту, вайннал творчествалул дусшиву цIуларгун дур. Аза Аминтаева захIматну къашай шайхту, Ростроповичлул, циняв ччаннай бацIан бувну, ва хъин бан бувну бур. 1997 шинал январь зуруй Аза Аминтаева дунияллия лавгун бур. 2001 шинал Санкт-Петербурглив хьу­сса музыкалул форумрай Мстислав Леопольдовичлул трибуналия миннат бувну бур залдануву Дагъусттаннаяту­сса вакилтал бухьурча, цачIанма гъан хьияра куну. ВаначIан гъан хьуну бур Дарбантуллал музыкалул школалул директор Лариса Литвинова. «Жулва билаятрайгу, дазул кьатIувгу Аза Аминтаевал цIа ххуйну кIулссар. Жува буржлув­ссару ва гьунар бусса хъамитайпалул аьпа хIурматрай ябуван. Ттул вихь хъунмасса миннатри, школалун Аминтаевал цIа дизансса хIарачат бувара, журив зул чIарав буссару мудангу», – увкуну бур ванал. Вана укун хьуссар Дарбантуллал музыкалул школалун Аза Аминтаевал цIа дизаврил тарихгу. Ялун ххи банна, машгьурсса историк ва чичу Булач ХIажиевлул «Дагъусттаннал душру» тIисса луттираву Аминта­хъал тухумрал хIакъираву чивчумургу.

«БивкIун бур, къабивкIун бур Гуржис­ттаннай князь Амин­тай Батаношвилил кулпат. Ва кулпатран, политикалул ишир­ттавух хIала хъанайтIий, паччахIлугърал переворот дуван кьаст лархIунутIий, ватандалия ливхъун, Алазаннал вацIраву ва нуххардиву кIучI хъанан багьну бур. Зунттурдавух буклайсса вайннал мина Гъумук хьуну дур. Жяматрая ихтияргу ларсун, бярнил чIарав цIакь хьуну бур. Тай Лаккуйн дачIрасса каруннищал къабувкIхьунссия, мукьрайра хъуни къатри дурну духьувкун, царай цирдагу шанзивулий­сса. Яла лакравух мархри хIала бувххун, цалчинма залуннал Аминтайл цIа ларчIун, Аминтахъул хьуну бур. Гъумук вайннал хIурмат лахъсса бивкIун бур. Ца кьини Аминтайн хъатIуйн оьвкуну бивкIун бур. Та хъатIуй ивкIун ур лакрал агьалинал «заллу» Агълархангу. Батаношвилийн ящайхту, Агълардул, кIяласса чаргас-чухълувусса ва мусил ярагъуннищалсса та цур куну цIувххуну бур. Та ттуяр аваданссарив, ттуяр дурккуссарив, ттуяр аькьлу буссарив тIий, дяъви бувну, нукартурайн амру бувну бур танал вичIи кьукьин. Нукарналгу дахьва ца мурцIу кьувкьуну бур. Аминтайл щарну бувцуну бивкIссар цIаларгсса щайх Жамалуттиннул душ Шуаьнат. Вайннал мукьа арс ва шанма душ бивкIссар. Вай циняв итххявхсса агьлу бивкIссар. Масалдаран, ХIажи Ккавкказнаву аьрасайнал паччахIнал наместникну ивкIссар, Оьмар тIима арс Александр III оьрчIалсса буллалисса, тайннащал игьалаган Къиримнавунгума лагай­сса, вихшаласса инсан ивкIссар. Оьмардул ва Зулайхатлул арснал душри Аза Аминтаевагу». Аза Аминтаевал цIа личIантIиссар Дагъусттан гьазгу, машгьургу бувминнал тарихраву ца язимур ххуттай.